63 ta kompaniya o‘z majburiyatlarini bajarmagani uchun IT Park rezidenti maqomini yo‘qotdi. Bu haqda kompaniya matbuot xizmati xabar bermoqda.
IT Park rezidenti maqomini olishni xohlovchi IT-kompaniyalar soni muttasil ortib bormoqda. Biroq, turli sabablarga ko‘ra bunday maqomdan va shunga mos ravishda soliq imtiyozlaridan mahrum bo‘lgan korxonalar ham mavjud.
Rezidentlar faoliyati Vazirlar Mahkamasining 2019-yil 15-iyuldagi 589-sonli qarori talablariga muvofiq bo‘lishi shart.
Qolaversa, kompaniyalar IT Park rezidenti faoliyati shartlari to‘g‘risidagi shartnomaga amal qilish majburiyatini oladilar, ya’ni:
- biznes-rejada ko‘rsatilgan ishlarni ro‘yxatga muvofiq amalga oshirish;
- IT Park’ga har chorakda o‘z faoliyati to‘g‘risida hisobot taqdim etish;
- har yili moliya-xo‘jalik faoliyati auditini o‘tkazish va auditorlik xulosasining bir nusxasini IT Park’ga taqdim etish;
- rezidentning IT Park bilan faoliyati shartlari to‘g‘risidagi shartnomadan kelib chiqadigan majburiyatlarni bajarish.
Nizom talablarini buzgan rezidentlar IT Park rezidenti maqomidan mahrum etiladi hamda soliq organlari imtiyozlarni bekor qilish choralarini ko‘rgan holda O‘zbekiston davlat budjetiga belgilangan tartibda soliq to‘lash majburiyatlari tiklanadi.
Izoh (0)