Zoom Video Communications videokonferensaloqa kompaniyasi “global iqtisodiyotdagi noaniqliklar” tufayli 1 300 nafar xodimini ishdan bo‘shatadi. Bu haqda kompaniya rahbari Erik Yuanga tayanib “RBK” xabar berdi.
Yuanga ko‘ra, kompaniya yangi, postpandemiya sharoitida ishlashni davom ettirish uchun o‘z xodimlarining 15 foizini ishdan bo‘shatishi kerak bo‘ladi.
Kompaniya rahbari, shuningdek, ba’zi bo‘limlar “o‘z tuzilmalarini tahrirlashi” haqida ham ma’lum qilgan.
Yuanning o‘zi ish haqini 98 foizga qisqartirib, korporativ bonusdan voz kechmoqchi. Shuningdek, 2023-yilda Zoom top-menejerlari ish haqini 20 foizga qisqartiradi va bonuslardan voz kechadi.
O‘tgan yilning noyabrida Zoom EMEA (Yevropa, Yaqin Sharq va Afrika) mintaqasida yillik daromadning 9 foizga kamaygani haqida xabar bergan. Daromad 182 million dollarni tashkil etdi.
Daromadning kamayishi Osiyo-Tinch okeani mintaqasida ham qayd etilgan bo‘lib, bu ko‘rsatkich 146 million dollarni tashkil etgan, bu o‘tgan yilning shu davriga nisbatan 3 foizga kam.
Kompaniya hisobotida aytilishicha, daromadning kamayishiga dollar kursining kuchayishi, Rossiya va Ukraina o‘rtasidagi urush va onlayn faollikning kamaygani sabab bo‘lgan.
Shunga qaramay, Amerikada Zoom’ning daromad ortgan — 11 foizga o‘sib, 774 million dollarni tashkil etgan. Kompaniyaning umumiy daromadi 5 foizga o‘sib, 1,1 trln dollarni, sof foyda esa 323,2 million dollarni tashkil etgan.
Izoh (0)