IT Park 35 ta kompaniyani o‘z majburiyatlarini bajarmagani uchun IT Park rezidenti maqomidan mahrum qildi. Bu haqda kompaniya matbuot xizmati xabar bermoqda.
Rezidentlar Vazirlar Mahkamasining 2019-yil 15-iyuldagi 589-son qarori talablariga muvofiq faoliyat yuritishi va IT Park rezidenti faoliyati shartlari to‘g‘risidagi shartnomaga muvofiq majburiyatlarni bajarishi shart.
Xususan, asosiy majburiyatlar qatoriga quyidagilar kiradi:
- biznes-rejada ko‘rsatilgan faoliyat turlarini Ro‘yxatga muvofiq amalga oshirish;
- IT Park’ka har chorakda o‘z faoliyati to‘g‘risida hisobot taqdim etish;
- har yili moliya-xo‘jalik faoliyati auditini o‘tkazish va auditorlik xulosasining bir nusxasini IT Park’ka yuborish;
- rezidentning IT Park bilan ishlash shartlari to‘g‘risidagi shartnomadan kelib chiqadigan majburiyatlarni bajarish.
Nizom talablarini buzgan rezidentlar IT Park rezidenti maqomidan mahrum etiladi. Soliq tashkilotlari esa imtiyozlarni belgilangan tartibda O‘zbekiston Davlat byudjetiga to‘lash majburiyatlari tiklangan holda bekor qilish choralarini ko‘radi.
IT Park rezidenti maqomidan mahrum bo‘lgan kompaniyalar orasida Toshkent shahridagi Prosoft, TIB Solutions va High Innovation Space kabi kompaniyalar bor.
Avvalroq IT Park’da rezident kompaniyalar keskin ko‘paygani haqida xabar berilgan edi.
Izoh (0)