63 та компания ўз мажбуриятларини бажармагани учун IT Park резиденти мақомини йўқотди. Бу ҳақда компания матбуот хизмати хабар бермоқда.
IT Park резиденти мақомини олишни хоҳловчи IT-компаниялар сони муттасил ортиб бормоқда. Бироқ турли сабабларга кўра бундай мақомдан ва шунга мос равишда солиқ имтиёзларидан маҳрум бўлган корхоналар ҳам мавжуд.
Резидентлар фаолияти Вазирлар Маҳкамасининг 2019 йил 15 июлдаги 589-сонли қарори талабларига мувофиқ бўлиши шарт.
Қолаверса, компаниялар IT Park резиденти фаолияти шартлари тўғрисидаги шартномага амал қилиш мажбуриятини оладилар, яъни:
- бизнес-режада кўрсатилган ишларни рўйхатга мувофиқ амалга ошириш;
- IT Park’га ҳар чоракда ўз фаолияти тўғрисида ҳисобот тақдим этиш;
- ҳар йили молия-хўжалик фаолияти аудитини ўтказиш ва аудиторлик хулосасининг бир нусхасини IT Park’га тақдим этиш;
- резидентнинг IT Park билан фаолияти шартлари тўғрисидаги шартномадан келиб чиқадиган мажбуриятларни бажариш.
Низом талабларини бузган резидентлар IT Park резиденти мақомидан маҳрум этилади ҳамда солиқ органлари имтиёзларни бекор қилиш чораларини кўрган ҳолда Ўзбекистон давлат бюджетига белгиланган тартибда солиқ тўлаш мажбуриятлари тикланади.
Изоҳ (0)