Isroil prezidenti Isxak Gersog sud-huquq islohoti loyihasiga qarshi ommaviy norozilik namoyishlari fonida xalqqa qilgan murojaatida mamlakat qulash yoqasida ekanini aytdi. Bu haqda The Times of Israel xabar berdi.
“Mamlakat ijtimoiy va konstitutsiyaviy qulash yoqasida. Siyosiy yo‘lning har ikki tomonida turgan fuqarolar zo‘ravonlikdan, ayniqsa, davlat xizmatchilari va saylangan mansabdor shaxslarga nisbatan zo‘ravonlikdan tiyilishi kerak”, — dedi Gersog.
Isroil rahbari o‘zi ham hukumat islohotlarining mohiyatidan qattiq xavotirda ekanini aytib, ular mamlakatning "demokratik asoslari"ga zarar yetkazishi mumkinligini ta’kidladi. Siyosatchi ushbu o‘zgarishlarning kiritilishi qonuniy ekanini aytib, "murosaga kelish uchun asos" izlashga chaqirdi.
Isroilda namoyishlar bo‘lib o‘tmoqda
Isroilda norozilik namoyishlari yanvar oyi boshida Binyamin Netanyaxu hokimiyatga kelganidan beri davom etmoqda. Norozilik namoyishlari Adliya vazirligi rahbari sud-huquq islohotini, jumladan Oliy sudning vakolatlari qonun va hukumat qarorlari bilan bog‘liq holatlarda cheklanishini taklif qilganidan keyin boshlandi.
Vazirlar Mahkamasi sudyalarni tanlash ustidan ham nazoratni qo‘lga oldi. Muxolifat islohot Isroilning demokratik qadriyatlariga tahdid soladi, deb hisoblaydi. 11-fevral kungi so‘rov shuni ko‘rsatdiki, 60 foiz odam hukumat sud-huquq islohotini to‘xtatish yoki keyinga qoldirishni xohlaydi.
Netanyaxu norozilik namoyishlarini muxolifat uning noyabrdagi saylovlardagi g‘alabasini tan olishdan bosh tortgani bilan bog‘ladi. Isroil bosh vaziri yanvar oyi oxirida islohot rezonansga qaramay, baribir qabul qilinishini aytdi.
“So‘nggi kunlarda men sud-huquq islohotlarining iqtisodiy barqarorlikka ta’siri haqidagi xavotirlarni eshitdim. Buning aksi to‘g‘ri. Islohot o‘tgach, qonun ustuvorligi buzilmagani va hatto mustahkamlanganini hamma ko‘rishiga aminman”, — dedi Netanyaxu.
Islohot iqtisodiyotga zarar yetkazishi haqida mamlakatning Markaziy banki rahbari Amir Yaron ham ogohlantirgandi.
Izoh (0)