Исроил президенти Ицхак Герцог суд-ҳуқуқ ислоҳоти лойиҳасига қарши оммавий норозилик намойишлари фонида халққа қилган мурожаатида мамлакат қулаш ёқасида эканини айтди. Бу ҳақда The Times оf Israel хабар берди.
“Мамлакат ижтимоий ва конституциявий қулаш ёқасида. Сиёсий йўлнинг ҳар икки томонида турган фуқаролар зўравонликдан, айниқса, давлат хизматчилари ва сайланган мансабдор шахсларга нисбатан зўравонликдан тийилиши керак”, — деди Герцог.
Исроил раҳбари ўзи ҳам ҳукумат ислоҳотларининг моҳиятидан қаттиқ хавотирда эканини айтиб, улар мамлакатнинг "демократик асослари"га зарар етказиши мумкинлигини таъкидлади. Сиёсатчи ушбу ўзгаришларнинг киритилиши қонуний эканини айтиб, "муросага келиш учун асос" излашга чақирди.
Исроилда намойишлар бўлиб ўтмоқда
Исроилда норозилик намойишлари январь ойи бошида Биньямин Нетаньяху ҳокимиятга келганидан бери давом этмоқда. Норозилик намойишлари Адлия вазирлиги раҳбари суд-ҳуқуқ ислоҳотини, жумладан Олий суднинг ваколатлари қонун ва ҳукумат қарорлари билан боғлиқ ҳолатларда чекланишини таклиф қилганидан кейин бошланди.
Вазирлар Маҳкамаси судьяларни танлаш устидан ҳам назоратни қўлга олди. Мухолифат ислоҳот Исроилнинг демократик қадриятларига таҳдид солади, деб ҳисоблайди. 11 февраль кунги сўров шуни кўрсатдики, 60 фоиз одам ҳукумат суд-ҳуқуқ ислоҳотини тўхтатиш ёки кейинга қолдиришни хоҳлайди.
Нетаньяху норозилик намойишларини мухолифат унинг ноябрдаги сайловлардаги ғалабасини тан олишдан бош тортгани билан боғлади. Исроил бош вазири январь ойи охирида ислоҳот резонансга қарамай, барибир қабул қилинишини айтди.
“Сўнгги кунларда мен суд-ҳуқуқ ислоҳотларининг иқтисодий барқарорликка таъсири ҳақидаги хавотирларни эшитдим. Бунинг акси тўғри. Ислоҳот ўтгач, қонун устуворлиги бузилмагани ва ҳатто мустаҳкамланганини ҳамма кўришига аминман”, — деди Нетаньяху.
Ислоҳот иқтисодиётга зарар етказиши ҳақида мамлакатнинг Марказий банки раҳбари Амир Ярон ҳам огоҳлантирганди.
Изоҳ (0)