2022-yilda Eron yashirin ravishda Rossiyaga uzoq masofaga uchuvchi jangovar dronlar partiyasini topshirgan deb yozmoqda The Guardian manbalariga tayanib.
Nashrning yozishicha, Moskva va Tehron o‘rtasidagi kelishuv noyabr oyida tuzilgan. O‘shanda Rossiya delegatsiyasi oltita Mohajer-6, shuningdek, 12 ta Shahed 191 va 129 dronlarining yetkazib berilishiga kelishgan. Eron Rossiyaga ilgari bergan kamikadze dronlardan farqli o‘laroq, bu dronlar ko‘p marta foydalanish uchun mo‘ljallangan – zarba berganidan so‘ng ular bazaga qaytib keladi.
Gazetaning aniqlik kiritishicha, Rossiya yanda ilg‘orroq uchuvchisiz uchoqlarni olishdan manfaatdor, chunki Ukraina Qurolli kuchlari Rossiya qo‘llayotgan Shahed-131 va Shahed-136 kamikadze dronlarini samarali tarzda urib tushirishni o‘rgandi.
Nashr manbasining aniqlik kiritishicha, dronlar Rossiyaga ikki yo‘nalish bo‘yicha yetkazilgan — ularning bir qismi Eron kemasi orqali jo‘natilgan, u yukni Kaspiy dengizidagi Rossiya harbiy-dengiz floti kemasiga o‘tkazgan. Qolganlari Eron davlat aviakompaniyasi tomonidan yetkazilgan. Shu bilan birga, Eron dronlari bilan birga rossiyalik harbiylarga ularni boshqarishni o‘rgatish uchun 54 nafar instruktorlar jo‘natilgani aytilmoqda.
The Guardian nashrining xabariga ko‘ra, Rossiyaga yetkazib berilgan uchoqlar yanvar oyi oxirida aviazarbaga uchragan Isfaxon zavodida ishlab chiqarilgan. Bu kelgusida ham Rossiyaga dronlar yetkazib berilishini shubha ostiga qo‘yadi, chunki zarba oqibatida zavod jiddiy zarar ko‘rgan bo‘lishi mumkin, deb yozmoqda nashr.
Rossiya urushda Eron dronlaridan foydalanmoqda
Rossiya harbiylari Ukrainadagi harbiy va energetika obyektlariga zarba berish uchun Eronda ishlab chiqarilgan Shahed-131/136 kamikadze dronlaridan faol foydalanmoqda. Ularning nomi “Geran-1” va “Geran-2” ga o‘zgartirilgan.
2022-yilning kuzida The Washington Post gazetasi Rossiya o‘z hududida Eron dronlarini ishlab chiqarishni yo‘lga qo‘yishni rejalashtirayotgani haqida xabar bergandi. 2023-yil yanvar oyi boshida Ukraina Milliy xavfsizlik va mudofaa kengashi kotibi Aleksiy Danilov Tolyatti shahrida dronlarni ishlab chiqarish tashkil etilishi mumkinligini ma’lum qildi. Fevral oyida The Wall Street Journal Rossiya va Eron rasmiylari Tataristonning Yelabuga shahrida dron ishlab chiqaruvchi zavod qurishni ko‘rib chiqayotgani haqida yozdi.
Izoh (0)