NATO saytlari xakerlik hujumiga uchradi. Kiberhujumlar ortida kim turibdi?

Shimoliy Atlantika alyansi (NATO) onlayn resurslari xakerlar tomonidan kiberhujumlarga uchraganini ma’lum qildi. Bu haqda The Telegraph xabar berdi.

Xakerlar Turkiya-Suriya zilzilasidan jabrlanganlarga yordam ko‘rsatayotgan NATO va harbiy samolyotlar o‘rtasidagi aloqani uzgan. Ayni paytda xavfsizlik bo‘yicha mutaxassislar kiberhujumni tekshirmoqda. Hujum bir vaqtning o‘zida NATOga tegishli bo‘lgan bir nechta resurslarga ta’sir o‘tkazgan.

NATO saytlarida qanday ma’lumotlar saqlangani va xakerlar nima uchun ularga qiziqish bildirgani noma’lumligicha qolmoqda. Ammo hujum ortida rossiyalik xakerlar guruhi Killnet turgani ta’kidlangan. NATO saytlariga kiberhujum qilgan rossiyalik xakerlar avvalroq Bundestag, Germaniyaning muhim infratuzilmalari veb-saytlariga hujum qilgan xakerlar guruhi sanaladi. Rossiyalik xakerlar AQSH harbiy bazasi saytiga ham buzib kirgan.

Kiberhujumga uchragan alyansning veb-saytlaridan biri NATO maxsus operatsiyalari shtab-kvartirasining internet resursi bo‘lgan. Ammo hozircha departament matbuot xizmati kiberhujumlar yetkazgan zararni aniqlamadi.