Armaniston Turkiyaga 100 tonna gumanitar yordam yubordi. Buning uchun 30 yildan beri yopiq bo‘lgan arman-turk quruqlik chegarasi ochildi (video, foto)

11-fevral kuni ertalab Armanistondan gumanitar yordam ortilgan beshta yuk mashinasi 1993-yildan beri yopiq bo‘lgan Armaniston—Turkiya chegarasini kesib o‘tdi. Armanistonning Margara shahri yaqinidagi to‘g‘ridan to‘g‘ri chegarani kesib o‘tish jarayonidan video Armaniston tashqi ishlar vaziri o‘rinbosari Vaan Kostanyan tomonidan eʼlon qildi.

Humanitarian aid from #Armenia crossed the Margara bridge on #Armenia-#Turkey border heading to earthquake-stricken region. pic.twitter.com/7lwWrbE3fa

— Vahan Kostanyan (@VahanKostanyan) February 11, 2023

Ayni paytda Turkiyaning Anadolu agentligi qayd etishicha, ushbu o‘tish joyidan oxirgi marta 1988-yilda Armanistonda 25 ming kishining hayotiga zomin bo‘lgan zilziladan keyin insonparvarlik yordamini yetkazishda foydalanilgan.

“News.am” agentligining xabar berishicha, Armaniston Turkiyaga oziq-ovqat va dori-darmondan iborat 100 tonna gumanitar yordam yubordi.

O‘z navbatida, Anqaraning arman-turk muzokaralaridagi maxsus vakili Serdar Qilich armanistonlik hamkasblari va Armaniston xalqiga yordam uchun minnatdorlik bildirdi: “Zilziladan jabr ko‘rgan hududlardagi xalqimiz azob-uqubatlarini yengillashtirish uchun Armaniston xalqining ko‘rsatgan saxovatli yordamini hamisha yodda saqlayman”, — deb yozdi u Twitter’da.

2023-yilning 6-fevralida Turkiyada kuchli zilzilalar sodir bo‘ldi — so‘nggi ma’lumotlarga ko‘ra, 30 mingga yaqin odam halok bo‘lgan. Zilzila Suriyaga ham jiddiy ta’sir ko‘rsatdi, u yerda qurbonlar soni 3 574 dan 8 500 gacha deb baholanmoqda.

Armaniston—Turkiya chegarasi 1993-yilda yopilgan. Mamlakatlar o‘rtasidagi keskinlik ko‘plab omillar, jumladan, Turkiyaning Qorabog‘ mojarosida Ozarbayjonni qo‘llab-quvvatlagani bilan bog‘liq.

Mamlakatlar o‘rtasida diplomatik aloqalar yo‘qligiga qaramay, Armaniston va Turkiya 2022-yil yozida to‘g‘ridan to‘g‘ri havo qatnovlarini tezroq tiklash va uchinchi davlat fuqarolari uchun o‘zaro quruqlik chegarasini ochish bo‘yicha kelishib oldi. Birinchi bevosita reyslar amalga oshirilgani haqida 2023-yil fevral oyining boshida maʼlum bo‘ldi.