11 февраль куни эрталаб Арманистондан гуманитар ёрдам ортилган бешта юк машинаси 1993 йилдан бери ёпиқ бўлган Арманистон—Туркия чегарасини кесиб ўтди. Арманистоннинг Маргара шаҳри яқинидаги тўғридан тўғри чегарани кесиб ўтиш жараёнидан видео Арманистон ташқи ишлар вазири ўринбосари Ваан Костанян томонидан эълон қилди.
https://twitter.com/VahanKostanyan/status/1624289234210246657Айни пайтда Туркиянинг Anadolu агентлиги қайд этишича, ушбу ўтиш жойидан охирги марта 1988 йилда Арманистонда 25 минг кишининг ҳаётига зомин бўлган зилзиладан кейин инсонпарварлик ёрдамини етказишда фойдаланилган.
“News.am” агентлигининг хабар беришича, Арманистон Туркияга озиқ-овқат ва дори-дармондан иборат 100 тонна гуманитар ёрдам юборди.
Ўз навбатида, Анқаранинг арман-турк музокараларидаги махсус вакили Сердар Қилич арманистонлик ҳамкасблари ва Арманистон халқига ёрдам учун миннатдорлик билдирди: “Зилзиладан жабр кўрган ҳудудлардаги халқимиз азоб-уқубатларини енгиллаштириш учун Арманистон халқининг кўрсатган саховатли ёрдамини ҳамиша ёдда сақлайман”, — деб ёзди у Twitter’да.
2023 йилнинг 6 февралида Туркияда кучли зилзилалар содир бўлди — сўнгги маълумотларга кўра, 30 мингга яқин одам ҳалок бўлган. Зилзила Сурияга ҳам жиддий таъсир кўрсатди, у ерда қурбонлар сони 3 574 дан 8 500 гача деб баҳоланмоқда.
Арманистон—Туркия чегараси 1993 йилда ёпилган. Мамлакатлар ўртасидаги кескинлик кўплаб омиллар, жумладан, Туркиянинг Қорабоғ можаросида Озарбайжонни қўллаб-қувватлагани билан боғлиқ.
Мамлакатлар ўртасида дипломатик алоқалар йўқлигига қарамай, Арманистон ва Туркия 2022 йил ёзида тўғридан тўғри ҳаво қатновларини тезроқ тиклаш ва учинчи давлат фуқаролари учун ўзаро қуруқлик чегарасини очиш бўйича келишиб олди. Биринчи бевосита рейслар амалга оширилгани ҳақида 2023 йил февраль ойининг бошида маълум бўлди.
Изоҳ (0)