Olimlar yadroviy apokalipsisdan omon qolishi mumkin bo‘lgan eng yaxshi mamlakatlarni aniqladi. Bu haqda ular olib borgan tadqiqotga tayanib, “Fokus.ua” xabar berdi.
Tadqiqotchilar Mett Boyd va Nik Uilson 38 ta orol davlatidagi global ofatlar ta’sirini o‘rgandi. Ular dunyo aholisinining kamayishiga ta’sir o‘tkazuvchi texnogen va tabiiy ofatlarni ko‘rib chiqdi. Mamlakatlarning oziq-ovqat va energiya ishlab chiqarish imkoniyati, mavjud boshpanalar inobatga olindi.
Shu tariqa ular yadroviy apokalipsisda Yangi Zelandiya va Avstraliyadagi odamlar omon qolish ehtimoli yuqoriligini ma’lum qildi. Keyingi o‘rinlarni Islandiya, Solomon orollari, Vanuatu davlati, Indoneziya, Filippin va Mavrikiy egalladi.
Yangi Zelandiya
Yangi Zelandiya yadroviy apokalipsis sodir bo‘lgan taqdirda eng xavfsiz joy deb topildi, chunki u haroratning keskin o‘zgarishiga chidamli va yadroviy qish ta’siridan himoya qiluvchi okean bilan o‘ralgan. Bundan tashqari, u yadro quroliga ega emas, shu uchun yirik davlatlar unga hujum qilishi dargumon. Eng yomon holatda, Yangi Zelandiya o‘z hosilining 61 foizini yo‘qotadi, lekin baribir omon qolish uchun yetarli oziq-ovqatni saqlab qoladi. Asosiy muammo Buyuk Britaniya va AQSH bilan savdoni to‘xtatishi, shuningdek, energiya ta’minotining zaiflashishi hisoblanadi.
Avstraliya va Islandiya
Avstraliyada hayvonlar va ekinlar nobud bo‘lgan taqdirda odamlarga omon qolishga yordam beradigan oziq-ovqat zaxirasi mavjud. Islandiya NATOga a’zo bo‘lgani uchun ko‘proq xavf ostida, biroq u qayta tiklanadigan energiyaning ko‘plab manbalariga, shuningdek, katta baliq zahiralariga ega.
“Texnologik jamiyat hatto omon qolish imkoniyati yuqori bo‘lgan mamlakatlarda ham qulashi mumkin. Bu oziq-ovqat mahsulotlarini ishlab chiqarishga jiddiy to‘sqinlik qiladi. Oziq-ovqat va energiya iqlim ta’siridan omon qolish imkoniyatini maksimal darajada oshirishda ahamiyatga ega”, — ta’kidladi tadqiqot mualliflari.
Izoh (0)