Ukrainaning Rossiya tomonidan bosib olingan Mariupol shahrida qayta tiklab bo‘lmaydigan binolar buzilib, chiqindilardan yo‘l qurishda foydalaniladigan beton shag‘allar hosil qilinadi. Bu haqda shaharning okkupatsion hokimiyati vakili, “Kommunalnik” munitsipal korxonasi direktori Dmitriy Xajinov “RIA Novosti”ga ma’lum qildi.
Uning so‘zlariga ko‘ra, hozirda Mariupolning barcha tumanlarida shahar o‘qqa tutilganidan keyin qayta tiklash imkonsiz bo‘lib qolgan binolarni buzish ishlari olib borilmoqda. Rossiya Qurilish vazirligi binolar chiqindilarini ularni beton shag‘allarga aylantiradigan maydalash zavodlariga topshirdi, keyinchalik ular yo‘l qurilishida qo‘llaniladi, deydi Xajinov.
Uning so‘zlariga ko‘ra, ayni paytda Mariupolda 2,5 million tonnaga yaqin qurilish chiqindilari to‘plangan bo‘lib, bu 37 gektar maydonni egallaydi.
Rossiya qo‘shinlari Mariupolga urush boshida hujum qilgandi. Ular shaharni qattiq bombardimon qildi, oqibatda shahar deyarli butunlay vayron bo‘ldi.
Mariupolda qancha tinch aholi halok bo’lgani noma’lum. Ukraina tomonining taxminlariga ko‘ra, gap o‘n minglab odamlar haqida ketmoqda.
2022-yil may oyi oxirida, “Azovstal” zavodini himoya qilayotgan ukrainalik harbiylar o‘z qo‘mondonligi buyrug‘iga binoan rejali taslim bo‘lganidan keyin Rossiya armiyasi Mariupolni uzil-kesil qo‘lga kiritganini e’lon qildi.
Izoh (0)