11 февраль оқшомида Шимолий Америка аэрокосмик мудофаа бирлашган қўмондонлиги Канада ҳаво ҳудудида номаълум учар аппаратни туширди. Бу ҳақда Канада бош вазири Жастин Трюдо маълум қилди.
Канада мудофаа вазири Анита Ананднинг айтишича, объект тахминан 12 километр баландликда учган ва мамлакат шимоли-ғарбида, АҚШ—Канада чегарасидан тахминан 160 километр узоқликда уриб туширилган. Мамлакат Қуролли кучлари ва Қироллик отлиқ полицияси учар аппаратни ўрганиш учун унинг қолдиқларини йиғиш операциясини бошлаган.
Бу сўнгги ҳафтада америкалик ҳарбийлар томонидан уриб туширилган учинчи объект: 4 февраль куни АҚШ Хитойнинг разведкачи ҳаво шарини уриб туширганди, 10 февралда эса Аляска узра яна бир номаълум учар аппарат уриб туширилди.
Февраль ойи бошида АҚШ расмийлари америкалик ҳарбийлар бир неча кундан бери мамлакат ҳаво ҳудудида учаётган Хитой шарини кузатаётгани ҳақида хабар берганди. Кейинроқ Хитой Ташқи ишлар вазирлиги бу тадқиқот шари экани, у йўлидан оғиб, тасодифан АҚШ ҳудудига кириб қолганини даъво қилди.
4 февраль куни АҚШ ҳарбийлари Атлантика океани устида шарни уриб туширди. Кейинроқ АҚШ Давлат департаменти уриб туширилган шар электрон разведка ускуналари билан жиҳозлангани ва Хитой разведка дастурининг бир қисми эканини маълум қилди.
Изоҳ (0)