Asal Shodiyevadan uzr so‘ragan Nilufar Usmonova, ukasi bilan duet, jonli ijro va qo‘rquv. Shohruxxonning kino-konsertidan reportaj (video)

“Daryo” muxbirlari xonanda Shohruxxonning “Ey yor” deb nomlangan konsert dasturidan foto va video reportaj tayyorlashdi.

Bu yilgi dastur avvalgilaridan tubdan farq qiladi. Chunki dastur kino-konsert tarzida sahnalashtirgan. Xonanda yangi dasturda 23 ta qo‘shiq ijro etdi. Ular orasida yangi taronalar ham, muxlislar qalbidan chuqur joy olgan hit qo‘shiqlar ham bor.

Quvonarlisi, shu kungacha konsertlarida deyarli jonli qo‘shiq kuylamagan ijodkor, bu gal to‘rtta qo‘shiqni jonli ijroda kuyladi.

Shohruxxon Nilufar Usmonova, Afro‘za va Muhammadali Navro‘zov bilan duet kuyladi. Samimiy va chapani Nilufar Usmonova sevgini tarannum etgan duet uchun Asal Shodiyevadan uzr so‘radi. Aktrisa unga katta guldasta sovg‘a qilib, uzrini qabul qilganini bildirdi.

Konsertga Jamshid Hojiniyozovdan tashqari, aktyor Asqar Hikmatov va Mo‘min Ibrohimovlar ham rejissorlik qilishdi.

— Bu yilgi konsert o‘ziga xos bo‘lishini istadim. Chunki karantin sabab 3 yil konsert berolmadim. Kino-konsert uchun jiddiy tayyorgarlik ko‘rildi. Dasturni tuzishda jamoamizdagi har bir insonning fikrini o‘rgandim. G‘oya bir kishiga tegishli emas, chunki uning yaratilishida juda ko‘pchilikning hissasi bor, — deydi Shohruxxon.

— O‘g‘lim bu yilgi konsertiga jiddiy tayyorgarlik ko‘rdi. Konsertdan ikki kun oldin “Xalqlar do‘stligi” sanʼat saroyida kelib, jonli ijro ustida ishladi. Kuzatgan bo‘lsangiz, sahnada nafaqat qo‘shiq kuyladi, balki raqqoslar bilan birga raqs tushib, aktyorlik ham qildi.

Ob-havo noqulay bo‘lishiga qaramay atayin konsert uchun qo‘shni Respublikalardan va viloyatlardan ham tashrif buyurishdi. O‘g‘limga ko‘rsatilgan ehtirom uchun barcha muxlislarga minnatdorlik bildiraman. Farzandlarning muvaffaqiyatini ko‘rish ota-ona uchun katta baxt, — deydi xonandaning onasi Zebo Navro‘zova.

— Konsertga bir hafta qolganida meni rejissorlikka taklif etishdi. Konsert g‘oyasi menga tegishli emas. Shohruxxon bilan birinchi marta ishlashim, ikkimiz ham bir-birimizni o‘rgandik.

Kino-konsert tushunchasi o‘zbek tomoshabini uchun yangilik bo‘lsa-da, xorij sanʼatkorlarining ko‘pchiligi undan foydalanishadi. Shohruxxonga “Benom”ning konserti yoqqandir, u ham shu yo‘nalishda dastur tuzishni istabdi, — deydi konsert rejissori Jamshid Xojiniyozov.

— Akamga duet kuylash taklifini berdim. Menimcha, yomon qo‘shiq yaralmadi. Kelajakda yana duetlar ijro etish niyatimiz bor.

Kamchiliksiz ishning o‘zi yo‘q. Konsertning tashkiliy ishlarda kamchiliklar bor. Ammo bu konsertning ilk kunida bo‘lishi tabiiy hol, — deydi xonandaning ukasi Muhammadali Navro‘zov.

Konsertning qiziqarli jarayonlari va san’atkorlarning qiziqarli intervyularini ko‘rishni istasangiz, “Daryo” internet nashrining YouTube’dagi kanaliga obuna bo‘ling.