Асал Шодиевадан узр сўраган Нилуфар Усмонова, укаси билан дуэт, жонли ижро ва қўрқув. Шоҳруххоннинг кино-концертидан репортаж (видео)

“Дарё” мухбирлари хонанда Шоҳруххоннинг “Эй ёр” деб номланган концерт дастуридан фото ва видео репортаж тайёрлашди.

Бу йилги дастур аввалгиларидан тубдан фарқ қилади. Чунки дастур кино-концерт тарзида саҳналаштирган. Хонанда янги дастурда 23 та қўшиқ ижро этди. Улар орасида янги тароналар ҳам, мухлислар қалбидан чуқур жой олган ҳит қўшиқлар ҳам бор.

Қувонарлиси, шу кунгача концертларида деярли жонли қўшиқ куйламаган ижодкор, бу гал тўртта қўшиқни жонли ижрода куйлади.

Шоҳруххон Нилуфар Усмонова, Афрўза ва Муҳаммадали Наврўзов билан дуэт куйлади. Самимий ва чапани Нилуфар Усмонова севгини тараннум этган дуэт учун Асал Шодиевадан узр сўради. Актриса унга катта гулдаста совға қилиб, узрини қабул қилганини билдирди.

Концертга Жамшид Ҳожиниёзовдан ташқари, актёр Асқар Ҳикматов ва Мўмин Иброҳимовлар ҳам режиссёрлик қилишди.

— Бу йилги концерт ўзига хос бўлишини истадим. Чунки карантин сабаб 3 йил концерт беролмадим. Кино-концерт учун жиддий тайёргарлик кўрилди. Дастурни тузишда жамоамиздаги ҳар бир инсоннинг фикрини ўргандим. Ғоя бир кишига тегишли эмас, чунки унинг яратилишида жуда кўпчиликнинг ҳиссаси бор, — дейди Шоҳруххон.

— Ўғлим бу йилги концертига жиддий тайёргарлик кўрди. Концертдан икки кун олдин “Халқлар дўстлиги” санъат саройида келиб, жонли ижро устида ишлади. Кузатган бўлсангиз, саҳнада нафақат қўшиқ куйлади, балки раққослар билан бирга рақс тушиб, актёрлик ҳам қилди.

Об-ҳаво ноқулай бўлишига қарамай атайин концерт учун қўшни Республикалардан ва вилоятлардан ҳам ташриф буюришди. Ўғлимга кўрсатилган эҳтиром учун барча мухлисларга миннатдорлик билдираман. Фарзандларнинг муваффақиятини кўриш ота-она учун катта бахт, — дейди хонанданинг онаси Зебо Наврўзова.

— Концертга бир ҳафта қолганида мени режиссёрликка таклиф этишди. Концерт ғояси менга тегишли эмас. Шоҳруххон билан биринчи марта ишлашим, иккимиз ҳам бир-биримизни ўргандик.

Кино-концерт тушунчаси ўзбек томошабини учун янгилик бўлса-да, хориж санъаткорларининг кўпчилиги ундан фойдаланишади. Шоҳруххонга “Беном”нинг концерти ёққандир, у ҳам шу йўналишда дастур тузишни истабди, — дейди концерт режиссёри Жамшид Хожиниёзов.

— Акамга дуэт куйлаш таклифини бердим. Менимча, ёмон қўшиқ яралмади. Келажакда яна дуэтлар ижро этиш ниятимиз бор.

Камчиликсиз ишнинг ўзи йўқ. Концертнинг ташкилий ишларда камчиликлар бор. Аммо бу концертнинг илк кунида бўлиши табиий ҳол, — дейди хонанданинг укаси Муҳаммадали Наврўзов.

Концертнинг қизиқарли жараёнлари ва санъаткорларнинг қизиқарли интервьюларини кўришни истасангиз, “Дарё” интернет нашрининг YouTube’даги каналига обуна бўлинг.