Toshkent va Lyublyana shaharlari o‘rtasida aviaqatnovlar yo‘lga qo‘yilishi kutilmoqda. Bu haqda investisiyalar, sanoat va savdo vaziri Laziz Kudratovning Sloveniya bosh vaziri o‘rinbosari Tanya Fayon bilan 9-fevral kungi uchrashuvida ma’lum qilindi.
O‘zbekiston tomonidan Yevropa Ittifoqining GSP+ preferensiyalar tizimi benefisiar maqomidan faol foydalanilayotgani sababli 2022-yilda 40 foizga oshgan o‘zaro tovar ayirboshlash hajmi o‘sishining ijobiy dinamikasi haqida fikr almashilgan. Tomonlar ushbu maqomni uzaytirish doirasida chora-tadbirlar ko‘rish va undan samarali foydalanish bo‘yicha o‘zbek eksportyorlariga zarur yordam ko‘rsatish orqali ushbu yo‘nalishdagi hamkorlikni kengaytirishga kelishib olgan.
Doimiy ravishda qo‘shma biznes-forumlari va “O‘zbekiston va Sloveniyada ishlab chiqarilgan” ko‘rgazmalarini o‘tkazish orqali investisiyaviy hamkorlik va sanoat kooperasiyasini rivojlantirish istiqbollari muhokama qilindi. Shu nuqtai nazardan, energetika, qishloq xo‘jaligi, to‘qimachilik va farmasevtika sanoati, infratuzilma qurilishi va IT-texnologiyalari sohalari qo‘shma loyihalarni amalga oshirishning eng ustuvor yo‘nalishlari sifatida belgilangan.
Transport va logistika sohasidagi hamkorlikni rivojlantirish imkoniyatlari ham ko‘rib chiqilgan. Xususan, Sloveniya delegasiyasi rahbari ikki davlat poytaxtlari o‘rtasida charter va muntazam aviaqatnovlarni yo‘lga qo‘yishni taklif qilgan. Tomonlar ushbu yo‘nalishdagi keyingi amaliy qadamlarni muhokama qilish uchun aviasiya idoralari o‘rtasida onlayn maslahatlashuvlar o‘tkazishga kelishib olgan. Muzokaralar yakunida iqtisodiy hamkorlik bo‘yicha O‘zbekiston—Sloveniya hukumatlararo komissiyasini tashkil etish tashabbusini ilgari surishga tayorliklarini bildirgan.
Izoh (0)