Тошкент ва Любляна шаҳарлари ўртасида авиақатновлар йўлга қўйилиши кутилмоқда. Бу ҳақда инвестисиялар, саноат ва савдо вазири Лазиз Кудратовнинг Словения бош вазири ўринбосари Таня Файон билан 9 февраль кунги учрашувида маълум қилинди.
Ўзбекистон томонидан Европа Иттифоқининг GSP+ преференциялар тизими бенефициар мақомидан фаол фойдаланилаётгани сабабли 2022 йилда 40 фоизга ошган ўзаро товар айирбошлаш ҳажми ўсишининг ижобий динамикаси ҳақида фикр алмашилган. Томонлар ушбу мақомни узайтириш доирасида чора-тадбирлар кўриш ва ундан самарали фойдаланиш бўйича ўзбек экспортёрларига зарур ёрдам кўрсатиш орқали ушбу йўналишдаги ҳамкорликни кенгайтиришга келишиб олган.
Доимий равишда қўшма бизнес-форумлари ва “Ўзбекистон ва Словенияда ишлаб чиқарилган” кўргазмаларини ўтказиш орқали инвестициявий ҳамкорлик ва саноат кооперациясини ривожлантириш истиқболлари муҳокама қилинди. Шу нуқтаи назардан, энергетика, қишлоқ хўжалиги, тўқимачилик ва фармацевтика саноати, инфратузилма қурилиши ва IT-технологиялари соҳалари қўшма лойиҳаларни амалга оширишнинг энг устувор йўналишлари сифатида белгиланган.
Транспорт ва логистика соҳасидаги ҳамкорликни ривожлантириш имкониятлари ҳам кўриб чиқилган. Хусусан, Словения делегацияси раҳбари икки давлат пойтахтлари ўртасида чартер ва мунтазам авиақатновларни йўлга қўйишни таклиф қилган. Томонлар ушбу йўналишдаги кейинги амалий қадамларни муҳокама қилиш учун авиация идоралари ўртасида онлайн маслаҳатлашувлар ўтказишга келишиб олган. Музокаралар якунида иқтисодий ҳамкорлик бўйича Ўзбекистон—Словения ҳукуматлараро комиссиясини ташкил этиш ташаббусини илгари суришга таёрликларини билдирган.
Изоҳ (0)