Oʻzbekistonda dam olish kunlari harorat ko‘tariladi

Oʻzbekistonning barcha hududlarida dam olish kunlari quruq ob-havo boʻlishi kutilmoqda, deb xabar berdi “O‘zgidromet”.

Prognozlarga ko‘ra, faqat respublikaning ayrim togʻli hududlarida biroz qor yogʻishi mumkin.

Kechalari sovuq ob-havo saqlanib turadi. Harorat kechalari 2-7 daraja sovuq atrofida boʻladi. Kunduz kunlari havo 2-5 daraja iliqqacha, janubda 7-9 daraja iliqqacha ko‘tariladi. Yoʻllarda ba’zi joylarda yaxmalak saqlanib turadi.

Qayd etilishicha, respublikaning togʻli hududlarida 9—10-fevral kunlari kuchli qor yogʻib oʻtgani sababli qor qoplamining balandligi ikki kecha-kunduzda 60-70 santimetrga oshib 150 santimetrga yetdi. Bu me’yordan deyarli ikki barabor koʻp.

“Yangi yogʻgan qor beqaror holatda, shuning uchun qor koʻchish xavfi juda yuqori”, — deya “O‘zgidromet” tog‘li hududlarga boruvchilarni ogoh bo‘lishga chaqirdi.