“Kelgusi qishga yaxshilab tayyorgarlik ko‘rish, maktab, bog‘cha, oliy ta’lim muassasalari sovuq sabab yopilmasligi uchun “nimalar qilish kerak?” degan savolga javob topish lozim” – prezident

Ayni vaqtda prezident Shavkat Mirziyoyev Jizzax shahrida sanoatni rivojlantirish va qayta tiklanuvchi energiya manbalari masalalarida yig‘ilish o‘tkazmoqda. Bu haqda “Daryo” muxbiri xabar berdi.

Davlat rahbari o‘z nutqi avvalida insonlarga islohotlar bugun kerak ekanligini ta’kidladi. 

“Hozir muqobil energiya bo‘yicha ishni jadal davom ettiryapmiz. Kelgusi qishga yaxshilab tayyorgarlik ko‘rish, maktab, bog‘cha, oliy ta’lim muassasalari sovuq sabab yopilmasligi uchun “nimalar qilish kerak?” degan savolga javob topish lozim. Qayerga borsam hamisha ikkita masalani ko‘taraman: ta’lim va tibbiyot. O‘tgan 5 yilda ikki soha bo‘yicha ham katta ishlarni qildik, lekin hali amalga oshirilishi kerak bo‘lgan rejalar talaygina”, — dedi Shavkat Mirziyoyev. 

Jizzax viloyatida Qozon universitetining filiali bor. Davlat rahbari ushbu universitet qoshida tibbiyot o‘quv muassasasi ochilishi haqida gapirdi.

“Bugun Qozon davlat universitetining vakillari bilan gaplashdim. U yerda ta’lim berayotgan o‘qituvchilar anchagina tajribali. Bu yerda gaplashganimda ularning vakillari, “Hurmatli prezident, ruxsat bersangiz, Jizzaxga endi Qozondan kuchli mutaxassislarni olib kelib, universitetning Jizzax filiali qoshida bitta shifoxona va tibbiyot o‘quv muassasasini ochsak, nima deysiz?”, deb so‘radi. Ularga hozirgi yig‘ilishda faollar bilan maslahat qilaman buni, deb aytdim”, — deydi davlat rahbari.