Ayni vaqtda prezident Shavkat Mirziyoyev Jizzax shahrida sanoatni rivojlantirish va qayta tiklanuvchi energiya manbalari masalalarida yigʻilish oʻtkazmoqda. Bu haqda “Daryo” muxbiri xabar berdi.
Prezident koʻp yillar iqtisodiyoti paxtaga qaram boʻlgan Jizzaxni sanoatlashtirish boʻyicha katta islohotlarni amalga oshirilayotgani haqida gapirdi.
“Birinchidan, viloyatda yangi sanoat korxonalari barpo qilish uchun, soʻnggi olti yilda milliardlab dollar investitsiya jalb qilindi. Buning hisobiga, 2 mingga yaqin yangi korxonalar tashkil qilinib, ishlab chiqarish hajmi 1,9 baravarga oshdi.
Oldin viloyatning sanoat mahsuloti asosan paxta tolasi boʻlgan boʻlsa, hozirgi kunda elektrotexnika, optik tola, avtomobil, murakkab kimyoviy moddalar, energotejamkor materiallar kabi yuqori texnologik mahsulotlar ishlab chiqarilmoqda”, — dedi davlat rahbari.
Shavkat Mirziyoyev viloyatdagi sanoat eksporti 1,8 baravar oshib, 166 million dollarga yetganini aytdi.
“Bugungi kunda, sanoatda 54 ming aholi band boʻlib, shundan 6,5 ming nafari yuqori malakali mutaxassislar hisoblanadi. Misol uchun, “Jizzax” erkin iqtisodiy zonasida hozirgi kunda 370 million dollarlik 45 ta loyiha amalga oshirilmoqda.
Jizzax misolida bir narsani aniq aytish mumkin. Iqtisodiyotimizni barqaror rivojlantirish, dunyo bozorlariga jadal kirib borish va yuqori daromadli ish oʻrinlarini yaratish, faqat va faqat sanoat orqali boʻladi. Bu borada kelgusi ikki yilda Jizzaxda avtomobilsozlik va metallurgiya sohalarida yirik loyihalar ishga tushadi”, — dedi prezident.
Izoh (0)