O‘zbekistonda “Diniy bag‘rikenglik” ko‘krak nishoni ta’sis etiladi

2023-yil iyungacha Vazirlar Mahkamasi “Diniy bag‘rikenglik” ko‘krak nishonini ta’sis etish to‘g‘risida qonun loyihasi ishlab chiqadi. Bu jamoatchilik muhokamasiga qo‘yilgan davlat dasturi loyihasida ko‘zda tutilgan.

Qayd etilishicha, loyihada vijdon erkinligi kafolatlarini himoya qilish, dinlararo va konfessiyalararo totuvlik va bag‘rikenglikni mustahkamlashga hissa qo‘shgan davlat va jamoat tashkilotlari xodimlari, diniy ulamolar mehnatini munosib rag‘batlantirish maqsadida “Diniy bag‘rikenglik” ko‘krak nishonini ta’sis etish nazarda tutiladi.

Din ishlari bo‘yicha qo‘mita, Iqtisodiyot va moliya vazirligi topshiriq ijrosi uchun mas’ul etib belgilandi.

Bundan tashqari, mamlakatda millatlararo totuvlik, diniy bag‘rikenglik va xalqlararo do‘stlikni targ‘ib etuvchi madaniy-ma’rifiy tadbirlarni o‘tkazish rejalashtirilgan. Jumladan:

• 30-iyul – Xalqlar do‘stligi kuni munosabati bilan “Do‘stlik” festivali tashkil etiladi va o‘tkaziladi;
• 16-noyabr – Xalqaro bag‘rikenglik kuniga bag‘ishlab respublikaning barcha hududlarida “Bag‘rikenglik” haftaligi o‘tkaziladi.