2023 йил июнгача Вазирлар Маҳкамаси “Диний бағрикенглик” кўкрак нишонини таъсис этиш тўғрисида қонун лойиҳаси ишлаб чиқади. Бу жамоатчилик муҳокамасига қўйилган давлат дастури лойиҳасида кўзда тутилган.
Қайд этилишича, лойиҳада виждон эркинлиги кафолатларини ҳимоя қилиш, динлараро ва конфессиялараро тотувлик ва бағрикенгликни мустаҳкамлашга ҳисса қўшган давлат ва жамоат ташкилотлари ходимлари, диний уламолар меҳнатини муносиб рағбатлантириш мақсадида “Диний бағрикенглик” кўкрак нишонини таъсис этиш назарда тутилади.
Дин ишлари бўйича қўмита, Иқтисодиёт ва молия вазирлиги топшириқ ижроси учун масъул этиб белгиланди.
Бундан ташқари, мамлакатда миллатлараро тотувлик, диний бағрикенглик ва халқлараро дўстликни тарғиб этувчи маданий-маърифий тадбирларни ўтказиш режалаштирилган. Жумладан:
- 30 июль – Халқлар дўстлиги куни муносабати билан “Дўстлик” фестивали ташкил этилади ва ўтказилади;
- 16 ноябрь – Халқаро бағрикенглик кунига бағишлаб республиканинг барча ҳудудларида “Бағрикенглик” ҳафталиги ўтказилади.
Изоҳ (0)