Shavkat Mirziyoyev diplomatik munosabatlar o‘rnatilganining 30 yilligi munosabati bilan Turkmaniston prezidentiga tabrik yo‘lladi. Bu haqda Prezident matbuot xizmati xabar qildi.
“Oʻzbek va turkman xalqlari tarixidagi muhim va qutlugʻ sana – davlatlarimiz oʻrtasida diplomatik aloqalar oʻrnatilganining 30 yilligi munosabati bilan siz, janobi oliylariga samimiy tabriklarim va ezgu tilaklarimni yoʻllashdan behad mamnunman.
Turkmaniston biz uchun koʻp asrlik yaqin doʻst va ahil qoʻshni, umumiy madaniy anʼanalar, oʻxshash til va urf-odatlarga ega boʻlgan hamda davr sinovlaridan oʻtgan ishonchli sherikdir.
Ikki davlatning istiqlol yillarida bosib oʻtgan yoʻllariga nazar tashlar ekanmiz shuni alohida taʼkidlash oʻrinliki, 30 yil mobaynida mamlakatlarimiz oʻrtasidagi oʻzaro manfaatli hamkorlikning mustahkam siyosiy-diplomatik va huquqiy poydevorini yaratishga muvaffaq boʻldik.
Mushtarak siyosiy irodamiz orqali oʻzaro hurmat va bir-birini qoʻllab-quvvatlashga asoslangan strategik sheriklik munosabatlari soʻnggi yillarda sifat jihatidan yangi bosqichga koʻtarilib, amaliy mazmun bilan boyib bormoqda. Oliy darajadagi siyosiy muloqotlar, parlamentlararo va hududlararo aloqalar yanada faollashmoqda.
Savdo-iqtisodiy, ilmiy-texnikaviy va madaniy-gumanitar hamkorlik hamda suv xoʻjaligi masalalari boʻyicha Hukumatlararo komissiyalar doirasida ikki tomonlama faoliyatning barcha jabhalari boʻyicha qatʼiy saʼy-harakatlarni amalga oshirmoqdamiz.
Siz bilan 2022-yilda Toshkent, Samarqand va Ashxobod shaharlarida boʻlib oʻtgan doʻstona va sermahsul uchrashuvlarimiz chogʻida koʻp qirrali hamda uzoq muddatli hamkorlik aloqalarini izchil rivojlantirishdan manfaatdor ekanimizni yana bir bor tasdiqladik.
Shu oʻrinda xalqlarimiz farovonligi yoʻlida Oʻzbekiston va Turkmaniston oʻrtasida hali ishga solinmagan katta imkoniyatlar mavjudligini, oʻzaro savdo aylanmasini keskin oshirish va mahsulotlar nomenklaturasini kengaytirish hamda sanoat kooperatsiyasini yanada kuchaytirishga tayyor ekanimizni qayd etishni istardim.
Hurmatli Serdar Gurbanguliyevich!
Ishonchim komilki, davlatlarimiz oʻrtasida qaror topgan va boshqalarga ham oʻrnak boʻla oladigan strategik sheriklik munosabatlari bundan buyon ham azaldan yaqin qardosh ellarimizning umumiy manfaatlari va ravnaqi yoʻlida muvaffaqiyatli rivojlanib boraveradi.
Fursatdan foydalanib, Sizga mustahkam sogʻliq, oilaviy baxt-saodat va gʻoyat masʼuliyatli faoliyatingizda ulkan zafarlar, qardosh Turkmaniston xalqiga esa tinchlik-osoyishtalik, doimiy taraqqiyot va yanada farovonlik tilayman”, — degan prezident o‘z tabrigida.
Izoh (0)