O‘zbekiston va Misr qadimiy qo‘lyozmalarni birgalikda tadqiq etishga kelishib oldi

O‘zbekiston elchixonasi ko‘magida Sharqshunoslik instituti hamda Misr Kitoblar va milliy arxivlar uyi bosh hay’ati o‘rtasida onlayn muzokaralar tashkil etildi, deb xabar bermoqda “Dunyo” axborot agentligi.

Qayd etilishicha, tadbir chog‘ida ikki muassasa o‘rtasidagi anglashuv memorandumining loyihasi mutaxassislar darajasida muhokama qilingan.

Uchrashuv davomida tomonlar tarix va madaniyat mavzularini qamrab olgan maqolalarni ikki davlatning ilmiy jurnallarida chop etish, qo‘lyozma asarlarini birgalikda tadqiq etish, ularni tiklash, elektron nusxalarini olish, o‘zaro konferensiya va forumlar o‘tkazish hamda boshqa yo‘nalishlar bo‘yicha hamkorlikni kengaytirish bo‘yicha kelishuvga erishgan.

Anglashuv memorandumi o‘zaro muvofiqlashtirilgani holda imzolanish uchun tayyor holga keltirilgan. Mazkur hujjatni O‘zbekiston—Misr iqtisodiy va ilmiy-texnikaviy hamkorligi bo‘yicha hukumatlararo komissiyaning navbatdagi 7-yig‘ilishi doirasida imzolash rejalashtirilgan.