Shavkat Mirziyoyev diplomatik munosabatlar o‘rnatilganining 30 yilligi munosabati bilan Gurbanguli Berdimuhamedovga tabrik yo‘lladi
Shavkat Mirziyoyev diplomatik munosabatlar o‘rnatilganining 30 yilligi munosabati bilan Turkman xalqining milliy yetakchisi, Turkmaniston Xalq maslahati raisi Gurbanguli Berdimuhamedovga tabrik yo‘lladi. Bu haqda Prezident matbuot xizmati xabar qildi.
“Sizni aloqalarimiz tarixidagi muhim sana — Oʻzbekiston va Turkmaniston oʻrtasida diplomatik aloqalar oʻrnatilganining 30 yilligi bilan samimiy tabriklab, eng ezgu tilaklarimni yoʻllashdan bagʻoyat xursandman.
Davlatlarimizning yaxshi qoʻshnichilik va oʻzaro yaqin hamkorlik rishtalari asrlar davomida yonma-yon tinch va totuv yashab kelayotgan, ildizlari mushtarak va qon-qardosh boʻlgan xalqlarimizning umumiy farovonligi va ravnaqiga, shuningdek, mintaqamiz tinchligi va barqarorligi uchun muhim poydevor boʻlib xizmat qilib kelmoqda.
Shu oʻrinda doʻst mamlakatlarimiz oʻrtasidagi hamkorlikni har tomonlama kengaytirishda, oʻzaro hurmat va ishonchga asoslangan strategik sheriklikni misli koʻrilmagan darajada yuksaltirishda Siz, Janobi Oliylarining qoʻshib kelayotgan ulkan hissangiz borligini alohida taʼkidlashni istar edim.
Siz bilan oʻrtamizda qaror topgan doimiy ochiq va ishonchli muloqotlar, davlatlararo munosabatlarimizni tartibga soluvchi samarali mexanizmlarning yaratilgani barcha ustuvor yoʻnalishlarda oʻzaro manfaatli hamkorlikni yanada kuchaytirish uchun mustahkam zamin boʻlib xizmat qilmoqda”, — deyiladi tabrik matnida.
Shavkat Mirziyoyev o‘z tabrigida Gurbanguli Berdimuhamedovning oqilona ichki va tashqi siyosati natijasida bugungi kunda Turkmaniston barcha jabhalarda katta yutuq va marralarga erishayotganini ta’kidlab o‘tgan.
2022-yilning 11-noyabrida Samarqandda boʻlib oʻtgan Turkiy davlatlar tashkiloti sammitida Sizning shaxsan ishtirokingiz va “Turkiy dunyoning oliy ordeni” bilan taqdirlangani anjumanning ahamiyatini yanada oshirishga beqiyos hissa qoʻshish barobarida, qardosh oʻzbek va turkman xalqlarining doʻstona aloqalari naqadar yuqori darajada ekanini dunyoga yana bir karra namoyish etganini qayd etgan.
“Hech shubhasiz, azaliy qardoshlik, boqiy doʻstlik va bir-birini qoʻllab-quvvatlash tamoyillariga asoslangan uzoq muddatli hamda keng qamrovli sherikligimiz bundan keyin ham izchil davom etadi, deb qatʼiy ishonaman.
Fursatdan foydalanib, Sizga mustahkam sogʻliq, uzoq umr, oilaviy baxt-saodat, sharafli faoliyatingizda ulkan muvaffaqiyatlar, qardosh turkman xalqiga esa tinchlik-osoyishtalik, davomiy taraqqiyot va farovonlik tilab qolaman”, — degan prezident o‘z tabrigida.
