“Oziq-ovqat narxlari oʻsishi bilan bogʻliq inflyatsion xatarlar qisqa muddatli xarakterga ega” – Mamarizo Nurmurodov

Oʻzbekistonda kuzatilayotgan oziq-ovqat mahsulotlari narxlarining oʻsishi bilan bogʻliq inflyatsion xatarlar qisqa muddatli xarakterga ega. Bu haqda Markaziy bank raisi Mamarizo Nurmurodov OAV vakillari ishtirokida oʻtkazilgan matbuot anjumanida maʼlum qildi, deya xabar berdi “Daryo” muxbiri.

Mamarizo Nurmurodovning aytishicha, anomal sovuq narxlar oshishiga taʼsir koʻrsatdi va bu jarayon uzoq vaqtga choʻzilmaydi.

“Yanvar oyida anomal sovuq ob-havo tufayli taklif bilan bogʻliq qisqa muddatli xatarlar ayrim turdagi mahsulotlarni ishlab chiqarish va yetkazib berish hajmlariga taʼsir koʻrsatdi. Xususan, qishloq xoʻjaligi mahsulotlarini bozorlarga yetkazib berish, bozorlarda kundalik savdolarni tashkil qilish borasida uzilishlar va kamchiliklar mavjud. Shuningdek, qoʻshni davlatlarda ham ayrim isteʼmol tovarlarining eksportiga cheklovlar kiritilmoqda. Bu ham maʼlum jihatdan bugungi kundagi narx-navoning shakllanishiga va inflyatsiyaga oʻzining taʼsirini koʻrsatuvchi omillardan hisoblanadi.

Hozirda asosiy turdagi oziq-ovqat mahsulotlari taklifi bilan bogʻliq muammolarni hal etish boʻyicha hukumat tomonidan tegishli choralar koʻrilmoqda. Biz ushbu vaziyat bilan bogʻliq inflyatsion xatarlarni qisqa muddatli xarakterga ega deb hisoblamoqdamiz. Yaʼni buni inflyatsiyaga taʼsirini yanvar oyida qisman sezishimiz mumkin va koʻriladigan choralar kelgusi oylarda narxlarning barqarorlashuviga olib keladi”, – dedi Markaziy bank rahbari.

Avvalroq Mamarizo Nurmurodov 2023-yilda Oʻzbekistonda kutilayotgan asosiy inflyatsion xatarlarni sanab oʻtgandi. Ular qatorida taklif bilan bogʻliq inflyatsion xatarlar ham mavjudligini aytgan.

“Masalan, metan gazi uzib qoʻyildi. Bu oʻz-oʻzidan benzin taqchilligini yuzaga keltirdi. Biz nima xatarni kutyapmiz deganda, Markaziy bank ertaga gaz “zapravka”lari ochiladigan boʻlsa, gaz narxini koʻtarilishidan xatarimiz bor”, – degan tashkilot rasmiysi.