Узоқ йиллардан буён давлат ташкилотларини ихчамлаштириш ҳақида гапириб келинар эди. Йилдан йилга давлат портфели шишиб бораверди. Натижада бу давлат бюджетига моддий юкламани ошириб юборди. Ва ниҳоят ўша узоқ кутилган маъмурий ислоҳот амалга оширилмоқда.
Бирданига 17 мингдан ортиқ ходимни қисқартириш бир қарашда ваҳималидек кўринади. Бу ишни тўхтатиб қўймайдими, тизим бузилиб кетмайдими, ишсизлар энди нима қилади ва ҳ.к. саволлар кўп. Шунинг ўзи ҳам маъмурий ислоҳотлар катта сиёсий ирода талаб қилганини кўрсатади.
Ўша ирода кўрсатилди. Энди буёғига ишни тўғри ва самарали ташкил қилиш қолди, холос.
Аҳолининг кўпчилик қисмида қисқартиришга тушган 17 минг 447 нафар ходимларни иш билан таъминлаш нима бўлади, деган савол туғилмоқда. Ушбу саволга Президент ҳузуридаги давлат хизматини ривожлантириш агентлиги департамент мудири Илҳом Қурбонов “Дарё” нашрига берган интервьюсида жавоб берди.
“Президентимизнинг Янги Ўзбекистон маъмурий ислоҳотларини амалга ошириш чора-тадбирлари тўғрисидаги фармонида алоҳида топшириқ кетган — Камбағалликни қисқартириш ва бандликни таъминлаш вазирлиги меҳнат қонунчилигидан келиб чиққан ҳолда лавозимдан қисқартиришга тушган ходимлар билан барча жараёнларни меҳнат қонунчилигига асосан амалга ошириш ва эртага уларнинг ижтимоий ҳуқуқлари бузилмаслигини кафолатлаш белгиланган.
Фармон ижросини таъминлаш мақсадида барча вазирлик раҳбарларига ўқувлар ташкил этилди. Ҳар бир қисқартиришга тушган ходимни иш билан таъминлашга ўша вазирлик ёки идоранинг биринчи раҳбари шахсан масъул. Ҳеч ким кўчада қолмайди, муносиб иш таклиф этилади.
Ҳар бир идора ва вазирликларнинг ўз қуйи тизимлари бор. Уларга ўз йўналишлари бўйича иш таклиф этилади. Бу қарорга келишдан аввал қисқартиришга тушган 17 минг 447 нафар ходим бўйича аниқ таҳлил ва ҳисоб-китоблар қилинган”, — деди Илҳом Қурбонов.
Давлат хизматини ривожлантириш агентлиги масъул ходимининг қўшимча қилишича, муносиб иш дейилганда шароит нуқтаи назаридан ҳам, моддий таъминот жиҳатидан ҳам уларга имконият берилади.
Аввалроқ эндиликда вазирлик ва идоралар қисқарган таркиб билан қандай ишлаши ҳақида хабар берилган эди.
Изоҳ (0)