Nukusdagi ko‘p qavatli uyda 29-yanvar kuni gaz portlashi oqibatida besh kishi halok bo‘lgandi. Qoraqalpog‘iston prokuraturasi holat yuzasidan jinoyat ishi qo‘zg‘atilganini ma’lum qildi.
Shaharning “Temir jol” mahallasida joylashgan 4 qavatli uyda gaz-havo aralashmasining chaqnashi tufayli portlash sodir boʻlib, uydagi bir nechta xonadonlarning tom va pol qismlari oʻpirilib, 4-qavatdan 1-qavatgacha tushib ketgandi.
Voqea natijasida ikki nafar fuqaro yengil tan jarohati bilan shahar shifoxonasiga joylashtirilib, jabrlangan fuqarolar zaruriy tibbiy hamda psixologik yordam olganidan so‘ng shifoxonadan chiqarilgandi.
Olib borilgan qidiruv-qutqaruv ishlari davomida vayronalar ostida qolib ketgan 5 yoshli qizaloq turli darajadagi jarohatlar bilan qutqaruvchilar tomonidan chiqarib olingan. Shuningdek, besh nafar fuqaroning jasadi topilgan.
Mazkur holat yuzasidan Jinoyat kodeksining 259-moddasi 2-qismi “b” bandi bilan jinoyat ishi qo‘zg‘atilib, tergov harakatlari olib borilmoqda.
Hozirda aybdor shaxslar doirasini aniqlash, ularni jinoiy javobgarlikka tortish masalasi hal etilmoqda.
Izoh (0)