Nukusda gaz portlashi oqibatida halok bo‘lganlar soni besh nafarga yetdi. Bu haqda FVV matbuot xizmati xabar berdi.
29-yanvar kuni soat 16:15 larda Nukusdagi 4 qavatli uyning to‘rtinchi qavatida joylashgan xonadonlarning birida havo-gaz aralashmasining chaqnashi sodir bo‘lgandi. Natijada uydagi bir nechta xonadonlarning tom va pol qismlari oʻpirilib, 4-qavatdan 1-qavatgacha tushib ketgan.
30-yanvar kuni soat 02:30 larda FVV qutqaruvchilari tomonidan turli darajadagi jarohatlar bilan vayronalar ostida qolib ketgan 5 yoshli qizaloq chiqarib olinib, malakali tibbiy yordam ko‘rsatish uchun shifoxonaga yuborilgan. Oradan 30 daqiqa o‘tib bino konstruksiyalari orasidan bir nafar fuqaroning jasadi topilgan.
Erta tongga kelib, vayronalar ostidan yana to‘rt nafar fuqaroning jasadi topilib, jami halok bo‘lganlar 5 nafarga yetdi.
Voqea joyida Favqulodda vaziyatlar vaziri boshchiligida hodisa oqibatlarini bartaraf etish ishlari davom etmoqda. Mazkur holat yuzasidan dastlabki tergovoldi surishtiruv ishlari olib borilmoqda.
Izoh (0)