Нукусдаги кўп қаватли уйда 29 январь куни газ портлаши оқибатида беш киши ҳалок бўлганди. Қорақалпоғистон прокуратураси ҳолат юзасидан жиноят иши қўзғатилганини маълум қилди.
Шаҳарнинг “Темир жол” маҳалласида жойлашган 4 қаватли уйда газ-ҳаво аралашмасининг чақнаши туфайли портлаш содир бўлиб, уйдаги бир нечта хонадонларнинг том ва пол қисмлари ўпирилиб, 4-қаватдан 1-қаватгача тушиб кетганди.
Воқеа натижасида икки нафар фуқаро енгил тан жароҳати билан шаҳар шифохонасига жойлаштирилиб, жабрланган фуқаролар зарурий тиббий ҳамда психологик ёрдам олганидан сўнг шифохонадан чиқарилганди.
Олиб борилган қидирув-қутқарув ишлари давомида вайроналар остида қолиб кетган 5 ёшли қизалоқ турли даражадаги жароҳатлар билан қутқарувчилар томонидан чиқариб олинган. Шунингдек, беш нафар фуқаронинг жасади топилган.
Мазкур ҳолат юзасидан Жиноят кодексининг 259-моддаси 2-қисми “б” банди билан жиноят иши қўзғатилиб, тергов ҳаракатлари олиб борилмоқда.
Ҳозирда айбдор шахслар доирасини аниқлаш, уларни жиноий жавобгарликка тортиш масаласи ҳал этилмоқда.
Изоҳ (0)