25-yanvar kuni oliy ta’lim, fan va innovatsiyalar vaziri Ibrohim Abdurahmonovning BMB Trade Group kompaniyasi Kuzatuv kengashi raisi Bekzod Mamatqulov bilan uchrashuvi bo‘lib o‘tdi. Bu haqda vazirlik axborot xizmati xabar qildi.
Qayd etilishicha, muloqot davomida oliy va kasb-hunar ta’lim muassasalari faoliyatini takomillashtirish hamda yoshlarni kafolatlangan ish o‘rinlari bilan ta’minlash borasidagi loyihalar doirasida davlat-xususiy sheriklikni yo‘lga qo‘yishga doir masalalar muhokama qilingan.
Xususan, Bekzod Mamatqulov O‘zbekistonda qishloq xo‘jaligi sohasida mutaxassislar tayyorlashga qaratilgan Italiyaning nufuzli universitetlari filiallarini ochish taklifini bildirgan. Shuningdek, Jizzax viloyatida faoliyat yuritayotgan kompaniya tarkibiga kiruvchi 28 ta korxonani kasb-hunar kollejlarida tahsil olgan mutaxassislar bilan ta’minlash zarurligini ta’kidlagan.
O‘z navbatida, Ibrohim Abdurahmonov BMB Trade Group kompaniyasi tomonidan bildirilgan takliflarni qo‘llab-quvvatlagan holda, ushbu masalalarni davlat-xususiy sheriklik doirasidagi maxsus loyihalar doirasida o‘rganishga tayyor ekanini bildirgan.
Uchrashuv yakunlari bo‘yicha tomonlar O‘zbekistonda Italiyaning nufuzli universitetlari filiallarini ochish, shuningdek, Jizzax viloyatidagi professional ta’lim muassasalaridan birini kompaniya tizimida faoliyat olib borayotgan korxonalar ehtiyojini hisobga olgan holda mutaxassislar tayyorlashga yo‘naltirish, buning uchun maxsus o‘quv dasturlarini ishlab chiqish va tasdiqlash masalasini o‘rnatilgan tartibda ko‘rib chiqish bo‘yicha kelishuvga erishgan.
Izoh (0)