25 январь куни олий таълим, фан ва инновациялар вазири Иброҳим Абдураҳмоновнинг BMB Trade Group компанияси Кузатув кенгаши раиси Бекзод Маматқулов билан учрашуви бўлиб ўтди. Бу ҳақда вазирлик ахборот хизмати хабар қилди.
Қайд этилишича, мулоқот давомида олий ва касб-ҳунар таълим муассасалари фаолиятини такомиллаштириш ҳамда ёшларни кафолатланган иш ўринлари билан таъминлаш борасидаги лойиҳалар доирасида давлат-хусусий шерикликни йўлга қўйишга доир масалалар муҳокама қилинган.
Хусусан, Бекзод Маматқулов Ўзбекистонда қишлоқ хўжалиги соҳасида мутахассислар тайёрлашга қаратилган Италиянинг нуфузли университетлари филиалларини очиш таклифини билдирган. Шунингдек, Жиззах вилоятида фаолият юритаётган компания таркибига кирувчи 28 та корхонани касб-ҳунар коллежларида таҳсил олган мутахассислар билан таъминлаш зарурлигини таъкидлаган.
Ўз навбатида, Иброҳим Абдураҳмонов BМB Trade Group компанияси томонидан билдирилган таклифларни қўллаб-қувватлаган ҳолда, ушбу масалаларни давлат-хусусий шериклик доирасидаги махсус лойиҳалар доирасида ўрганишга тайёр эканини билдирган.
Учрашув якунлари бўйича томонлар Ўзбекистонда Италиянинг нуфузли университетлари филиалларини очиш, шунингдек, Жиззах вилоятидаги профессионал таълим муассасаларидан бирини компания тизимида фаолият олиб бораётган корхоналар эҳтиёжини ҳисобга олган ҳолда мутахассислар тайёрлашга йўналтириш, бунинг учун махсус ўқув дастурларини ишлаб чиқиш ва тасдиқлаш масаласини ўрнатилган тартибда кўриб чиқиш бўйича келишувга эришган.
Изоҳ (0)