“Daryo” nashri 26-yanvarda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Rossiya qo‘shinlari havo hujumlarini kuchaytirmoqda, ukrainaliklar raketalardan qanday himoyalanadi?
Ukraina Qurolli kuchlari Harbiy-havo kuchlari qo‘mondonligining ma’lum qilishicha, Rossiya qo‘shinlari 26-yanvarga o‘tar kechasi Ukrainaga 24 ta “Shahed-136/131” kamikadze-dronlari bilan hujum qildi. Dronlarning barchasi urib tushirildi.
25-yanvar kuni kechqurun Ukrainaning ko‘plab hududlarida havo trevogasi yangragandi. “UNIAN” maʼlumotlariga koʻra, uchuvchisiz uchoqlarning asosiy qismi Zaporojye va Dneprbo‘yi viloyatlari ustida urib tushirilgan.
Bugun Rossiya kuchlari Kiyev yo‘nalishida 15 ta qanotli raketa uchirdi, havo hujumidan mudofaa tizimlari ularning barchasini urib tushirdi, deb xabar qilmoqda Kiyev harbiy ma’muriyati rahbari Sergey Popko.
Shahar Telegram kanallarida mahalliy aholining hujumdan yashirinib metroda o‘tirgani aks etgan videolar tarqalmoqda. Voqealar rivojida Kiyevning Dneprovsk tumanida portlashlar sodir bo‘ldi.
Shaharning Goloseyevskiy tumanidagi noturar joy binosiga raketa kelib tushdi. Halok bo‘lgan va yaralanganlar bor.
AQSH Ukrainaga Abrams tanklarini yuborishini ma’lum qildi biroq buning uchun bir yildan ko‘proq vaqt ketishi mumkin.
AQSH prezidenti Jo Bayden Ukrainaga 31 ta Abrams tanki yetkazilishini ma‘lum qildi. Bu haqda NBC news xabar berdi.
Baydenning so‘zlariga ko‘ra, yetkazib berish ko‘p vaqt talab etadi, biroq AQSH tez orada vaqtdan unumli foydalanish uchun ukrainalik harbiylarni o‘qitishni boshlaydi.
25-yanvar kuni AQSH hukumati Kiyevga 31 ta M1 Abrams tanklarini topshirishini ma’lum qildi. O‘z navbatida, Germaniya hukumati ham Ukrainaga Germaniya qurolli kuchlari zaxirasidan 14 ta Leopard 2 tankini jo‘natishi va boshqa davlatlarga reeksport uchun ruxsat berishini tasdiqladi.
Amerika OAVlarining yozishicha: “Tanklar Ukraina uchun maxsus General Dynamics tomonidan ishlab chiqarilishi sababli ularni yetkazib berish bir yildan ko‘proqqa kechiktirilishi mumkin”.
Germaniya boshqa davlatlarga tank yetkazishi uchun reeksport huquqini beradi ammo Ukrainaga faqat tanklarning o‘zi kamlik qiladi
Ayni vaziyatda Ukraina tanklar masalasi hal bo'lganidan so'ng G'arbdan raketa va samolyotlar olishni rejalashtirmoqda. Bu haqda Vladimir Zelenskiy videomurojaatda ma'lum qildi. Qolaversa, Prezident ofisi maslahatchisi Mixail Podolyak bu urushda Ukraina Qurolli kuchlari 1991-yildagi Ukraina chegaralarida to‘xtashini va jarayonni tezlashtirish uchun Ukrainaga ko'proq qurollar kerakligini aytdi.
O‘zbekistonda tenderdagi shubhali holat aniqlandi, jurnalist surishtiruvi
20-yanvar kuni “Daryo” internet-nashrida avtomobillarga fara va chiroqlar ishlab chiqarishga ixtisoslashgan Uz Chasys MCHJ o‘tkazgan tender shubhali ekani, raqobatchilar qarindosh bo‘lishi mumkinligi haqida material e’lon qilingandi. Ayni paytda Uz Chasys korxonasi tahririyatga xat yo‘llab, tender yuzasidan tuzilgan shartnoma bekor qilinganini ma’lum qildi.
Bojxona terminallaridan kelib tushgan yuklarni olib tushish, ko‘tarish xizmatini bajarish bo‘yicha boshlang‘ich qiymati 474 million so‘m bo‘lgan tenderda ikkita tadbirkorlik subyekti ishtirok etgandi.
G‘olib korxona manzili Andijon viloyati Jalolquduq tumani Jalolquduq shaharchasi, Namuna ko‘chasi deb ko‘rsatilgan. Rahbar — Ismanov Nuriddin G‘ulomjanovich. Ta’sischi esa Ismanov Muxiddin G‘ulomjanovich.
Mag‘lub MCHJ And Cargo Trans Service’ning rahbari boshqa — Kimsanboyev Davronbek Ibroximjonovich. Ammo manzili Andijon viloyati Jalolquduq tumanida deb ko‘rsatilgan korxonaning ta‘sischisi Ismanova Fatmaxon Igemberdiyevna. Maqolada Ismanov Muxiddin va Ismanova Fatma qarindosh bo‘lib chiqishi ehtimoli haqida so‘z borgan.
Uz Chasys taqdim etgan bayonnomaga ko‘ra, tanlov natijasi shubhali bo‘lgani sababli ikki ishtirokchidan qo‘shimcha hujjatlar taqdim etish so‘ralgan. Rad javobi olingach, tekshiruv va surishtiruv ishlari olib borilgan.
Natijada ta’sischilar va ularning ustav fondidagi ulushi haqida ma’lumotlariga ko‘ra bir oilaga tegishli bo‘lgan Ismanov Muxiddin Gulamjanovich va Ismanova Fatmaxon Igemberdiyevna 100 foiz ulush bilan afillangan shaxslar ekani va “Davlat xaridlari to‘g‘risida”gi qonunning 14-moddasida (manfaatlar to‘qnashuvi) ko‘rsatilgan qonun buzilishiga olib kelishi aniqlangan.
“Shuni aytib o‘tish kerakki, ikki korxona va tender komissiyasi a’zolarining hech qanday bog‘liqlik tomonlari mavjud emas”, — deyiladi bayonnomada.
Oxir-oqibat ishtirokchilar ushbu tenderni qabul qilmasligini va tanlovni rad etishini ma’lum qilgan. MCHJlar rahbarlari taqdim etilgan narxlardan voz kechib, tenderni bekor qilishga o‘zaro kelishib olgan.
Izoh (0)