Қозоғистонда 27 январдан бошлаб хорижликлар учун янгиланган кириш қоидалари кучга кирди. Унга кўра, эндиликда Евросиё иқтисодий иттифоқи (EOИИ) мамлакатлари — Россия, Беларусь, Armaniстон ва Қирғизистон фуқаролари учун “визаран” амалиёти бекор қилинади. Бундан кейин улар 6 ойлик даврда республикада фақат 90 кундан ортиқ бўлмаган муддатга қолиши мумкин. Агар бу муддат ошиб кетса, мамлакатни тарк этган хорижлик қайтиб кела олмайди. Янги қоидалар вақтинчалик яшаш учун рухсатнома олган шахсларга нисбатан қўлланилмайди.
Илгари EOИИ мамлакатлари фуқаролари “визаран” билан Қозоғистон чегарасини ҳар уч ойда бир марта кесиб ўтиб, қайтиб келиши мумкин эди. Бу амалиёт давлат ҳудудида қонуний яшаш муддатини янгилаш учун етарли эди.
Қозоғистон билан визасиз режимга эга бўлган бошқа мамлакатлар, жумладан Ўзбекистон фуқаролари учун республикада қолиш муддати 30 кун. Қозоғистонда қолиш муддатини узайтириш учун республикада яшаш рухсатномаси ёки вақтинчалик яшаш рухсатномасини олиш керак.
Республика Ички ишлар вазирлиги Миграция хизмати қўмитаси ташқи миграция бошқармаси бошлиғи Асқар Алдўнғаров янги чекловлар фақат республикага 27 январдан кейин кириб келган хорижликларга тааллуқли бўлишини таъкидлади.
Россияда сафарбарлик эълон қилинганидан кейин 400 мингдан ортиқ россиялик Қозоғистонга кириб келди
2022 йилнинг сентябрида Россияда сафарбарлик эълон қилинганидан кейин кўплаб россияликлар Украинадаги урушга юборилишдан қочиб Қозоғистонга кела бошлади. Қозоғистон Ички ишлар вазирлиги Миграция хизмати қўмитаси маълумотларига кўра, сентябрь ойида Россиянинг 406 минг фуқароси мамлакатга кириб келган, уларнинг аксарияти 21—30 сентябрь орасида келган. Унгача чегарани кунига ўртача 8—9 минг россиялик кесиб ўтган бўлса, сентябрь ойи охирида Россиядан ўртача суткалик оқим 30 минг кишига етди, деб хабар берди Tengrinews. Октябрь ойида Россиядан миграция оқими барқарорлашди ва йил охирида кунига 6-7 минг кишидан ошмайдиган бўлди.
Изоҳ (0)