Farg‘ona viloyati hokimligi Koreya delegatsiyasi dasturxoni uchun 88 million so‘m sarflagani ma’lum bo‘ldi

Farg‘ona viloyati hokimi Xayrulla Bozorov farmoyishi bilan Janubiy Koreyaning “Koreya pop-orkestri” va ishbilarmonlar delegatsiyasining viloyatga tashrifini tashkil etish ishlariga 177 million so‘m ajratilgan. 

Jumladan, xorijlik mehmonlarni oziq-ovqat bilan ta’minlash xizmati “Afrosiyob Tarix va Kelajak” MCHJ zimmasiga yuklatilgan. Ikki tomon o‘rtasida tendersiz amalga oshirilgan xarid kelishuviga ko‘ra, bu uchun tadbirkorlik subyekti hokimlikdan 88 million 702 ming so‘m olgan.

Hujjatga ko‘ra, Koreya delegatsiyasi dasturxoniga 40 turdagi mahsulot tortiladi. 

Bloger Zafar Solijonov holatga e’tibor qaratgan. U budjet mablag‘larini tejamkorlik bilan ishlatish zarurligini ta’kidlagan.

“Dekabrda Janubiy Koreyadan pop orkestri va ishbilarmonlar kelganakan. Kutib olish, kuzatish ishlariga Bozorov farmoyishi bilan 177 million so‘m ajratilibdi. Aslida kelgan mehmonlarga o‘zimizdagi mevalar, shakarob va achchiq mastavamiz qiziq bo‘ladi. Bular esa Koreyada arzon, lekin bizda qimmat va kilosi 450-480 ming so‘mlik foeyxua, golubika mevalarini qo‘yishibdi. Sal pulimizni tejab ishlatinglar, hokimiyatdagilar. Ijtimoiy sohaga yo‘naltirsangiz, ming marta rozimiz”, — deb yozadi Solijonov Telegram’dagi kanalida.