Медведев дунё учинчи жаҳон уруши хавфига яқинлашганини айтди (видео)

Россия Хавфсизлик кенгаши раиси ўринбосари Дмитрий Медведев дунё учинчи жаҳон уруши хавфига яқинлашганини айтди. Бу ҳақда «Интерфакс» хабар берди.

«Украинадаги ‘махсус операция’ АҚШ томонидан агрессия тайёрланишига жавобан мажбурий чора эди. Кўриниб турибдики, содир бўлаётган воқеалар туфайли дунё учинчи жаҳон уруши хавфига яқинлашди», — деди Медведев.

Унинг фикрича, »кўп томонлама дипломатия институтлари ўта жиддий инқирозни бошидан кечирмоқда: БМТ, биринчи навбатда, етакчи халқаро институт сифатида ва бошқа халқаро платформалар бир пайтлар низо ҳамда зиддиятли вазиятларни ҳал этиш учун яратилган бўлса, ҳозир улар жанг майдонида».

Шунингдек, Медведев  партия дипломатиясини, жумладан ШҲТ, ASEAN, БРИКС, Африка иттифоқи ва бошқа бир қатор платформалар каби йирик давлатлараро ассоциацияларни ривожлантириш ҳақида ўйлаш зарурлигини айтди. Бу кўп қутбли дунё тарафдорларининг нуфузли партиялараро коалициясини шакллантириш имконини беришини таъкидлади.

Аввалроқ Чеченистон раҳбари Рамзан Қодиров агар Европа ва НАТО мамлакатларини халқаро ҳамжамият ва Украинадаги низо иштирокчилари деб ҳисобласа, бўлаётган воқеаларни учинчи жаҳон уруши деб аташ мумкинлигини айтган. Бироқ кейинроқ Россия «махсус операция»сига жаҳон уруши мақомини бериш ноўрин экани, чунки «дунё НАТОдан иборат эмаслиги», Хитой, Ҳиндистон, Покистон каби кўплаб йирик мамлакатлар бетарафликни сақлаётганини таъкидлаган.

Ўз навбатида, Польша Россия томонидан бошланган урушда Украинанинг мағлуб бўлиши учинчи жаҳон урушининг бошланишига олиб келиши мумкинлигини билдирган. Шу учун Киевни қўллаб-қувватлашга тўсқинлик қилишга ва ишларни номаълум муддатга қолдиришга асос йўқлиги илгари сурилган.