Қозоғистон биринчи президенти Нурсултон Назарбоев касалхонага тушгани ҳақида ОАВлар «Хабар 24» собиқ директори Александр Аксютицнинг Facebook’даги постига таяниб хабар бермоқда.
Унинг қайд этишича, Назарбоевнинг юраги операция қилиниши мумкин.
Бироқ «Орда.кз» президент ишлари бошқармаси касалхонасига Нурсултон Назарбоев келиб тушмаганини маълум қилди.
Қозоғистон биринчи президенти 1940 йил 6 июль куни туғилган бўлиб, айни пайтда 82 ёшда.
2021 йил охирроғида берган интервьюсида Назарбоев умуртқасини операция қилдиргани давлат раҳбари лавозимидан кетишининг сабабларидан бири эканини тан олганди. «Аввал бу ҳақда умуман гапирмаганман, бу ўзига хос шовшувли янгилик бўлади. Мен умуртқамни, белимни операция қилдирганман ва жарроҳлик амалиёти анча жиддий эди», — дея ҳикоя қилган Назарбоев «Хабар» телеканалида 2021 йил 21 октябрь куни эфирга берилган «Портретга чизгилар» ҳужжатли фильмида.
Назарбоев соғлиғи билан боғлиқ муаммолар катта оммавий тадбир вақтида 2011 йилда кузатила бошлагани ҳақида ҳам гапирган.
Нурсултон Назарбоев 2019 йил 19 март куни президентлик лавозимидан кетиши ҳақида эълон қилган ва эртаси куни давлат раҳбари сифатида ўз ваколатларидан воз кечиши ҳақидаги фармонни имзолаган.
Эслатиб ўтамиз, Қозоғистонда Мажлис (парламент) депутатлари биринчи президент тўғрисидаги қонун ўз кучини йўқотган деб топди. Қонун Қозоғистон собиқ президенти Нурсултон Назарбоевга «элбоши» мақомини бериб, уни умрбод имтиёз ва кафолатлар билан таъминларди.
Изоҳ (0)