Rossiya prezidenti Vladimir Putinni va Rossiyaning Ukrainaga bostirib kirishini ochiqdan-ochiq qo‘llab-quvvatlagan parlament deputati Azamat Abildayev “Aq jol” partiyasidan chetlashtirildi. Bu haqda “KazTag” xabar berdi.
“Milliy kengash qaroriga ko‘ra, Abildayevni ‘Aq Jol’ demokratik partiyasidan chiqarish to‘g‘risida qaror qabul qilindi. Shu munosabat bilan ‘Aq jol’ partiyasi Markaziy saylov komissiyasiga Abildayevning deputatlik vakolatini tugatish to‘g‘risida xat yubordi”, — deyiladi partiya bayonotida.
Ta’kidlanishicha, Abildayev Ozodlik radiosiga bergan intervyusida Putin va Rossiyaning Ukrainaga bostirib kirishini qo‘llab-quvvatlashini aytgan. Uning fikricha, Ukraina yetakchilari “natsistlar”, ukrain xalqi esa yozgacha prezident Vladimir Zelenskiyni qo‘lga olib, sudga beradi.
Partiya raisi Azat Peruashev Abildayevning so‘zlari “Aq Jol” partiyasi pozitsiyasiga, partiyaviy va deputatlik etikasiga zid ekanini ta’kidladi. Qozog‘iston va boshqa mamlakatlarning mustaqilligi, hududiy yaxlitligi hamisha qo‘llab-quvvatlanib kelinganini bildirdi.
Izoh (0)