Britaniya Mudofaa vazirligi Ukraina uchun yordam paketi haqida e’lon qildi

Buyuk Britaniya mudofaa vaziri Ben Uolles parlamentda Ukraina uchun yangi yordam paketini taqdim etdi.

Mudofaa vaziri aytishicha, unga bosh vazir Rishi Sunak avvalroq Ukraina prezidenti Vladimir Zelenskiyga va’da qilgan 14 ta Challenger 2 tanklaridan tashqari, boshqa zirhli texnika ham, shu jumladan, “Buldog” sifatida mashhur bo‘lgan FV-432 bronetransportyori, AS90 o‘ziyurar gaubitsalari va uning snaryadlari kiradi.

Ushbu harbiy yordam paketi, deya ta’kidladi Uolles, Ukraina qo‘shinlari imkoniyatlarini sezilarli darajada oshiradi. “Bu shuni anglatadiki, ular Rossiya qo‘shinlariga qarshilik ko‘rsatishdan ularni Ukraina yerlaridan quvib chiqarishga o‘tishi mumkin bo‘ladi”, — dedi Britaniya mudofaa vaziri parlamentga murojaat qilib.

Uolles ta’kidlashicha, Buyuk Britaniya Ukrainaga G‘arbda ishlab chiqarilgan asosiy jangovar tanklarni taqdim etuvchi birinchi mamlakatga aylanadi.

15-yanvar kuni The Daily Mirror London Kiyevga Hellfire boshqariluvchi raketalari bilan jihozlangan Apache zarbdor vertolyotlarini ham yuborishi haqida yozgandi. Ammo bir necha soatdan keyin maqola saytdan o‘chirib tashlandi, Britaniya Mudofaa vazirligi esa undagi ma’lumotlar haqiqatga to‘g‘ri kelmasligini ma’lum qildi.