Россия президенти Владимир Путинга нисбатан ишончсизлик у билан эҳтимолий тинчлик музокаралари, ярашув режалари ва келишувлар ҳақидаги ҳар қандай муҳокамаларни тугатишга сабаб бўлди, деди Британия собиқ бош вазири Борис Жонсон «Европейская Правда» нашрига берган интервьюсида.
«Путинга ишониш керак эмаслиги шунчалик аниқ-равшанки, шу сабабли ҳам у билан ҳеч нарса ҳақида келишиб ололмайсиз… Шу сабабли ҳам у билан келишувга эришиш ғояси иш бермади. Ва ҳар сафар барчамиз ягона мантиқий хулосага қайтишга мажбур бўлардик, бу ҳам бўлса, Украинани қўлимиздан келганича қўллаб-қувватлашимиз кераклигидир», — дея тушунтирди у.
Россия қўшинларининг Украинага киритилишидан олдин баъзи Ғарб мамлакатлари ҳукуматлари Киевнинг туриб бериш имкониятларига шубҳа билан қараганди, бироқ вақт ўтиши билан улар бунинг тескарисига ишонч ҳосил қилди, деди Жонсон. Буюк Британия, деди у, дарҳол Россиянинг ҳарбий мағлубиятига эришишга қарор қилди, аммо Германия ва Франция дастлаб муросага келиш йўлларини қидиришни ва музокараларни бошлашни ёқлаб чиқди.
Қироллик собиқ бош вазири сўзларига кўра, Ғарб етакчиларининг баъзилари «Путин мағлуб бўлиши ҳақида гапириш» ҳаддан ташқари деб ҳисоблаб, бунинг учун бошқа сўзларни топишга чақирган. Жонсон таъкидлашича, уларни ўз позициясига кўндиришга уринган ва минимал мақсад сифатида Россия қўшинларининг 2022 йил 24 февралгача бўлган позицияларга чекинишига эришишга чақирган. Ғарб етакчиларини кўндиришга «Украина ҳарбий муваффақиятининг муқобили йўқ» деган аргумент қўл келди, деди у.
Франция президенти Эммануэль Makroн ва Германия канцлери Олаф Шольц Россия қўшинларининг Украинага киритилишига қадар Путин билан бир неча марта мулоқот қилиб, бундай сценарийдан воз кечишга чақирган, шу мақсад билан улар 2022 йил бошида Москвага келганди.
Путин ҳам Ғарб етакчиларига нисбатан ишончсизлик билдирганди. Бир йил аввал, махсус операция ҳақида эълон қилинишига қадар, у НАТОни шарққа томон кенгаштирмасликка ваъда беришиб, Москвани «доғда қолдириб кетишгани»ни айтганди. «Биз узоқ вақт чидадик, келишувга эришишга ҳаракат қилдик. Энди аниқланишича, бизни бурнимиздан судраб, алдаб юришган. Бу биз билан биринчи марта содир бўлаётгани йўқ», — деди у.
Изоҳ (0)