AQSHda Ilon Maskka qarshi sud jarayoni boshlandi
San-Fransisko sudida firibgarlik bo‘yicha milliarder Ilon Maskka qarshi sud jarayoni boshlandi. Bu haqda Deutsche Welle xabar berdi.
Sudga da’vo arizasi bilan murojaat qilganlar Tesla aksiyadorlari hisoblanadi. Ular Ilon Maskning tvitlari tufayli tovon puli talab qilmoqda. Milliarder 2018-yilda Tesla aksiyalarini har birini 420 dollarga sotib olishni rejalashtirgan xaridorlar topilgani haqida tvit qoldirgan. Shundan so‘ng investorlar narxi keskin ko‘tarilgan aksiyalarni sotib olishga shoshilgan.
Biroq vaqt o‘tgach, qimmatli qog‘ozlarning qiymati tushib ketgan. Natijada aksiyadorlar Maskning tvitlari tufayli milliardlab mablag‘ yo‘qotganini da’vo qilgan.
“Tesla kompaniyasi raisi va bosh direktori Ilon Mask yolg‘on gapirgani uchun biz suddamiz. Uning yolg‘onlari Glen Littleton kabi oddiy odamlarning millionlab dollar yo‘qotishiga olib keldi”, — deydi Tesla aksiyadorlarini jamoaviy da’voda himoya qiluvchi advokat Nikolas Porritt.
Bu voqea AQSH nazorat organlarining e’tiborini ham tortgan, Ilon Mask 40 million dollar jarima to‘lashi va Tesla rahbari lavozimini tark etishga rozi bo‘lgan. Maskning advokatlari San-Fransisko hududida xolis kuzatuvchilarni jalb qilishda qiyinchiliklar yuzaga kelganini aytib, sud jarayonini keyinga qoldirishga harakat qilgan, biroq muvaffaqiyatsizlikka uchragan. Sud jarayoni taxminan uch hafta davom etishi kutilmoqda.
Avvalroq milliarder Ilon Mask hujjatlarni qalbakilashtirgani va noqonuniy yashayotgani uchun AQSH fuqaroligidan mahrum etilishi mumkinligi xabar berilgandi. Mask 1995-yilda Pensilvaniya universitetining fizika fakultetini tamomlamagan va uning diplomi soxta ekani ta’kidlangandi.
