«Дарё» нашри 19 январда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Путин узоқ давом этадиган урушга тайёрлгарлик кўряптими?
Россия президенти Владимир Путин Украинага қарши узоқ муддатли урушга тайёрланмоқда. Буни исботловчи бир нечта омиллар бор, деди НАТО бош котиби ўринбосари Мирча Жоане Ҳарбий қўмита мажлиси чоғида. Жоаненинг қайд этишича, бунга бир қанча омиллар ишора қилмоқда, хусусан:
- яқинда 200 мингдан ортиқ россиялик ҳарбий хизматчиларнинг сафарбар қилиниши;
- маҳаллий қурол-яроғ ишлаб чиқариш ҳажмининг оширилиши;
- бошқа мамлакатлардан — хусусан, Эрондан қурол сотиб олиш суръатларининг оширилиши.
Аввалроқ Путин Россия амалга ошираётган ишлар, шу жумладан, «махсус операция» ҳам, гўёки, урушга нуқта қўйишга уриниш эканини айтганди.
Зеленский Си Цзиньпинни мулоқотга таклиф қилди
Украина президенти Владимир Зеленский Хитой халқ республикаси раиси Си Цзиньпинга хат ёзди, деб хабар беради South China Morning Post. Мактубни унинг рафиқаси Елена Зеленская Давосдаги иқтисодий форум чоғида Хитой вакилларига топширган.
Зеленская журналистларга маълум қилишича, хат мулоқотга таклифдан иборатдир, у Хитой раҳбарияти бу таклифга жавоб беришига умид билдирди. Владимир Зеленский анчадан буён Си Цзиньпинни Россия президенти Владимир Путинга босим ўтказиб, уни урушни тўхтатишга чақиришга уринмоқда, дейилади хабарда.
Хитой дипломатик даражада Россияга қарши чиқмаяпти — Пекин Украинада низо бошланишида Вашингтонни айбдор деб атамоқда шунингдек, БМТда Украинага босқин билан боғлиқ масалалар бўйича овоз беришда бетараф қолмоқда.
Киевнинг Қримга зарба бериш масаласида АҚШ ўз позициясини юмшатмоқда
Айни вазиятда ,АҚШ Украинани Қримдаги нишонларга зарба бериш имконига эга воситалар билан таъминлаш масаласи бўйича ўз позициясини аста-секин юмшатмоқда. Бу ҳақда The New York Times газетаси ёзади
Яриморол Россия томонидан аннексия қилинганидан бери АҚШ Қримни Украина ҳудуди деб таъкидлайди. Бироқ уруш бошланганидан кейин Қўшма Штатлар Киевга яриморолдаги нишонларга зарба бериш воситаларини жўнатишдан бош тортди.
NYT ёзишича, ҳарбийлар ва АҚШ президенти маъмуриятининг амалдорлари шахсий суҳбатларда Украина Қуролли кучларининг Қримга зарба бериши мақсадга мувофиқ эмаслигини таъкидлаб, фронтнинг бошқа қисмларидаги нишонларга эътибор қаратиш зарур деб ҳисоблаган.
Энди бўлса муносабат ўзгарган, деб ёзади NYT. Байден маъмурияти агар Украина кучлари Россияни Қрим устидан назоратни қўлдан чиқариш бўйича ташвишга тушира олса, бу келажакдаги ҳар қандай музокараларда Киев позициясини мустаҳкамлайди, деган фикрга келмоқда.
АҚШ расмийлари ва экспертлари орасида Россиянинг тактик ядро қуролларини қўллаши ҳақидаги хавотирлар ҳам пасайган, аммо уларнинг фикрича, бундай сценарий хавфи барибир сақланиб қолмоқда.
Мақолада таъкидланишича, Украинани Қримдаги нишонларга зарба беришга қодир масофада учадиган ракеталар билан таъминлаш ҳақида ҳали ҳеч қандай гап йўқ. Аммо Қрим кўприги сингари, яриморолнинг асосий таъминот йўлларига ҳужум қилиш учун HIMARS ёппасига ўт очиш тизимлари ва Bradley зирҳли машиналаридан фойдаланиш имконияти муҳокама қилинмоқда.
Айни вазиятда Германия канцлери Олаф Шольц: АҚШ Киевга Abrams танкларини жўнацагина, Берлин ҳам Леопардъларни юборишини маълум қилди
Ўзбекистонда онкологик касалликларни даволовчи дорилар ишлаб чиқарилади
Шавкат Мирзиёев Сингапурга давлат ташрифи доирасида фармацевтика йўналиши бўйича иккита келишув битимини имзолади. Бу ҳақда соғлиқни сақлаш вазири Амрилло Иноятов маълумот берди.
Қайд этилишича, ушбу мамлакатнинг «Мейнхардт Груп» компанияси ҳамкорлигида ташкил этилаётган Лойиҳалаштириш ва инжиниринг маркази билан иммунобиологик препаратлар ишлаб чиқарувчи, умумий қиймати 49 миллион долларга тенг фармацевтика корхонаси очилиши белгиланди.
Унга мувофиқ, мамлакатда касалликлар профилактикаси ва даволаш жараёнида қўлланадиган қуйидаги препаратлар тайёрлаш йўлга қўйилади:
- вакцина, анатоксин, пробиотик ва эубиотиклар;
- иммуноглобулин ва иммун зардоблари, ген инженерлиги йўли билан олинган моноклонал антитаналар;
- иммун коррексияси, иммун танқислиги муолажаси ва профилактикасида қўлланиладиган иммуномодуляторлар
Илдиз ҳужайралари ёрдамида жароҳат ёки дегенератив хасталиклар натижасида ўзгаришга учраган тўқималарни тиклаш мумкин. Шу маънода, лойиҳанинг амалга оширилиши туфайли онкологик касалликлар муолажаси ҳамда марказий асаб тизими ҳужайраларини тиклашда қўлланадиган биофармацевтик воситалар ишлаб чиқариш имконияти яратилади.
Изоҳ (0)