Афғонистоннинг Табиий офатлар оқибатларини бартараф этиш вазирлиги маълумотларига кўра, мамлакатда қаттиқ совуқ ва қор ёғиши оқибатида ҳалок бўлганлар сони 70 кишига етди.
«Дастлабки маълумотларга кўра, қор ёғиши ва совуқ ҳаво туфайли Бодғис, Ғазни, Нимруз, Ғор, Пактика, Ҳирот, Қандаҳор ва Фарёб, Сари-Пул Жузжон вилоятларида 70 киши ҳалок бўлган, шунингдек, Бодғис, Сари-Пул, Жузжон ва Фарёбда камида 70 минг бош қорамол нобуд бўлган», — деди вазирликнинг фавқулодда вазиятлар бўйича тезкор маркази раҳбари мулла Абдулла Муҳаммадий.
Афғонистон аҳолиси бу қишда мисли кўрилмаган совуқ бўлаётганини айтмоқда. Уларнинг фикрича, совуқ мавсумда қурбонлар сонининг кўпайишига сабаб — қашшоқлик ва ишсизлик.
«Биз халқаро ҳамжамият, маҳаллий маъмурият ва ҳамкор ташкилотлардан маҳаллий аҳолига ёрдам беришларини сўраймиз. Ҳаво анча совуқ, одамларнинг иқтисодий аҳволи жуда оғир», — дейди Бомиён вилоятида яшовчи Муҳаммад-Амин Халилий TOLOnews телеканалига берган интервьюсида.
Телеканалнинг бошқа суҳбатдошлари эса муҳтож оилаларга гуманитар ёрдам тарқатишни зудлик билан тиклаш зарур, деб ҳисобламоқда.
Табиий офат оқибатларини бартараф этиш вазирлиги вакилларининг таъкидлашича, охирги 28 кун ичида мамлакатнинг турли ҳудудларидаги совуқ тўлқиндан жабр кўрган 5 мингга яқин оилага озиқ-овқат ва ноозиқ-овқат ёрдам тўпламлари тарқатилган.
Изоҳ (0)