Rossiya prezidenti Vladimir Putin 18-yanvar kuni safarbarlikning yangi to‘lqini yoki maxsus operatsiya rejimi o‘zgartirilishi haqida e’lon qilmaydi. Bu haqda Putinning matbuot kotibi Dmitriy Peskov “Ostorojno Media” Telegram-kanaliga ma’lum qildi.
Putin 18-yanvar kuni Leningrad qamalining yorib o‘tilishiga 80 yil to‘lishi munosabati bilan o‘tkaziladigan tadbirda Ukrainaga nisbatan to‘liq urush e’lon qilishi yoki safarbarlikni davom ettirishi mumkinligi haqidagi savolga javoban Peskov: “Bularning barchasi mish-mish. Ularga e’tibor bermang”, — dedi.
“Ostorojno Media” yozishicha, avvalroq bir qator “hukumatparast Telegram-kanallar va blogerlar” prezident 18-yanvar kuni Ukrainaga nisbatan to‘la-to‘kis urush e’lon qilishi yoki maxsus harbiy operatsiya statusini aksilterrorchilik operatsiyasiga o‘zgartirishi, shuningdek, safarbarlikning yangi to‘lqini haqida e’lon qilishi mumkinligi haqidagi taxminlarni ilgari surgan edi.
Vladimir Putin qisman safarbarlik haqida 21-sentabr kuni e’lon qilgan edi. Uning yakunlangani haqida 31-oktabr kuni ma’lum qilindi. Ammo safarbarlikning tugatish haqida rasmiy farmon imzolangani yo‘q. Xabarlarga ko‘ra, Dmitriy Peskov Kremldagi huquqshunoslar bilan maslahatlashib, farmon talab etilmaydi, degan xulosaga kelgan. Shu bilan birga, internetda safarbarlikning ikkinchi to‘lqini haqida tasdiqlanmagan ma’lumotlar tarqaldi.
Xususan, 31-dekabr kuni Ukraina mudofaa vaziri Aleksey Reznikov yanvar boshida Rossiya hukumati harbiy xizmat yoshidagilar uchun chegaralarni yopib, chaqiruv qog‘ozlari yuborishni boshlashi haqida xabar bergandi. 14-yanvar kuni The Times o‘z manbalariga tayanib, Vladimir Putin yaqin orada safarbarlikning yangi to‘lqinini e’lon qilishi, uning doirasida 500 ming kishigacha odam armiyaga chaqirilishini ma’lum qilgandi.
Izoh (0)