Bruney sultoni, dunyodagi eng badavlat kishilardan biri hisoblangan Hassanal Bolkiah qizini turmushga berdi. Bu haqda Hype xabar berdi.
Malika Azema Nimatul Bolkiah amakivachchasi shahzoda Hoji Jefri Bolkiahga turmushga chiqdi. U Bruney sultonining ukasi, shahzoda Jefrining o‘g‘illaridan biri hisoblanadi. Bruney sultonining kamida 12 nafar farzandi bor, shuning uchun qirollik saroyida tez-tez to‘ylar bo‘lib turadi.
To‘ydan olingan suratlarni Bruney taxtiga da’vogar, malikaning akasi, shahzoda Abdul Mati o‘zining Instagram sahifasiga joylagan. U rasm ostiga “Men katta singlim uchun juda xursandman” deya izoh qoldirgan.
Malika Azema Nimatul Bolkiah 1984-yil 26-sentabrda tug‘ilgan. U Sulton Hassanal Bolkiahning sobiq ikkinchi xotini Hoji Mariamdan sakkizinchi farzandi hisoblanadi. Sulton oilasining aksariyat a’zolari singari u ham ot musobaqasiga qiziqadi. Hatto 2017-yili Kuala-Lumpurda bo‘lib o‘tgan Janubi-Sharqiy Osiyo o‘yinlarida terma jamoa safida ham o‘ynagan. Uning jamoasi turnirda bronza medalini qo‘lga kiritgan.
2021-yilda malika Azema Tokio-2020 Olimpiadasi oldidan gender tengligini targ‘ib qilish uchun tanlangan o‘n nafar sport elchisi qatoriga kirgan. Uning turmush o‘rtog‘i haqida juda kam ma’lum mavjud. Shahzoda Hoji ham ot minishga qiziqadi va badavlat insonlardan biri.
To‘y Bruney urf-odatlariga muvofiq va qirollik hashamati bilan o‘tkazilgan. Malika bir nechta liboslarda ko‘rinish bergan. Ulardan biri qimmatbaho toshlar bilan bezatilgan va olmos tiara bilan to‘ldirilgan. Ikkinchisi, milliy uslubda bo‘lib, oltin zargarlik buyumlari: toj, bilaguzuklar va sirg‘alar bilan bezatilgan.
Bruney hukmron oilasi a’zosining to‘yida har bir kelinning majburiy atributi ham bo‘lgan: oltin va qimmatbaho toshlar guldastasi va olmos bilan bezatilgan tufli. To‘yda yuzlab mehmonlar, jumladan, xorijiy davlatlar vakillari ham ishtirok etgan.
2022-yil 25-yanvarda Bruney sultoni yana bir qizini uzatgandi. Marosimdan keyin kelin va kuyov oltin mashinada harakatlangan.
Mavzuga doir:
Izoh (0)