Россия президенти Владимир Путин 18 январь куни сафарбарликнинг янги тўлқини ёки махсус операция режими ўзгартирилиши ҳақида эълон қилмайди. Бу ҳақда Путиннинг матбуот котиби Дмитрий Песков «Осторожно Медиа» Telegram-каналига маълум қилди.
Путин 18 январь куни Ленинград қамалининг ёриб ўтилишига 80 йил тўлиши муносабати билан ўтказиладиган тадбирда Украинага нисбатан тўлиқ уруш эълон қилиши ёки сафарбарликни давом эттириши мумкинлиги ҳақидаги саволга жавобан Песков: «Буларнинг барчаси миш-миш. Уларга эътибор берманг», — деди.
«Осторожно Медиа» ёзишича, аввалроқ бир қатор «ҳукуматпараст Telegram-каналлар ва блогерлар» президент 18 январь куни Украинага нисбатан тўла-тўкис уруш эълон қилиши ёки махсус ҳарбий операция статусини аксилтеррорчилик операциясига ўзгартириши, шунингдек, сафарбарликнинг янги тўлқини ҳақида эълон қилиши мумкинлиги ҳақидаги тахминларни илгари сурган эди.
Владимир Путин қисман сафарбарлик ҳақида 21 сентябрь куни эълон қилган эди. Унинг якунлангани ҳақида 31 октябрь куни маълум қилинди. Аммо сафарбарликнинг тугатиш ҳақида расмий фармон имзолангани йўқ. Хабарларга кўра, Дмитрий Песков Кремлдаги ҳуқуқшунослар билан маслаҳатлашиб, фармон талаб этилмайди, деган хулосага келган. Шу билан бирга, интернетда сафарбарликнинг иккинчи тўлқини ҳақида тасдиқланмаган маълумотлар тарқалди.
Хусусан, 31 декабрь куни Украина мудофаа вазири Алексей Резников январь бошида Россия ҳукумати ҳарбий хизмат ёшидагилар учун чегараларни ёпиб, чақирув қоғозлари юборишни бошлаши ҳақида хабар берганди. 14 январь куни The Times ўз манбаларига таяниб, Владимир Путин яқин орада сафарбарликнинг янги тўлқинини эълон қилиши, унинг доирасида 500 минг кишигача одам армияга чақирилишини маълум қилганди.
Изоҳ (0)