Rossiya Davlat dumasi mudofaa qo‘mitasi a’zosi, general-leytenant Viktor Sobolyev mamlakatdagi barcha yoshlarni majburiy harbiy tayyorgarlikdan o‘tishga chaqirdi. Bu haqda Rossiya Milliy axborot xizmati xabar berdi.
Sobolyevning so‘zlariga ko‘ra, hozirda Rossiyada “NATO bilan keng ko‘lamli urush” olib borish uchun safarbarlik zaxirasi mavjud emas. U safarbarlik qo‘shinlari bazasini tiklash va o‘quv mashg‘ulotlarini o‘tkazish, shuningdek, Rossiyada yoshlarning 100 foiz harbiy mutaxassislikka ega bo‘lishini ta’minlashga chaqirgan.
“Safarbarlik rezervi — armiya safida xizmat qilgan va yangi bo‘linmalarni shakllantirishga mo‘ljallangan o‘qitilgan shaxslardir. Agar NATO urush olib borish uchun o‘qitilgan safarbarlik zaxirasini ochsa, bizda bunday zaxira yo‘q. Bizda har o‘n kishidan biri armiyada xizmat qilgan, to‘qqiz nafari esa xizmat o‘tamagan.
Biz hamma narsani o‘zgartirishimiz kerak: o‘quv-mashg‘ulot yig‘inlarini o‘tkazish, yoshlarni DOSAAF (Rossiya armiyasi, aviatsiyasi va dengiz flotiga yordam berish ixtiyoriy jamiyati) tizimida tayyorlash kerak. Shu bilan birga, yoshlarning 100 foizi harbiy ro‘yxatga olish mutaxassisligiga ega bo‘lishi kerak. Ular harbiy ro‘yxatga olish ixtisosligiga ega bo‘lishi va urush paytida safarbarlik rezervida bo‘lishi uchun kamida olti oy tayyorgarlikdan o‘tishi kerak”, — deydi rossiyalik deputat.
Sobolyevning ta’kidlashicha, qisman safarbarlik harbiy maktablar asosida amalga oshirilgan, bu esa mutlaqo noto‘g‘ri.
Avvalroq Rossiyaning Sverdlovsk viloyatida deputat Vyacheslav Vegner ayol mahbuslarni Ukrainadagi urushga yuborishni taklif qilgandi. U ayollar maxsus harbiy operatsiya zonasiga signalchi, shifokor va hamshira sifatida borishga, Rossiya harbiylariga yordam berishga tayyorligini bildirgan. “Vagner” xususiy harbiy kompaniyasi rahbari Yevgeniy Prigojin deputatning taklifini qo‘llab-quvvatlagan.
Izoh (0)