“Hududgaz Toshkent” rahbari garov evaziga qo‘yib yuborildi

“Hududgaz Toshkent” filiali direktori Muzaffar Aliyevga nisbatan jinoyat ishi ochilgan hamda ehtiyot chorasi sifatida qamoqqa olingandi.

Toshkent viloyati prokuraturasining bayonotiga ko‘ra, tergov harakatlari davomida unga nisbatan qo‘llanilgan qamoq ehtiyot chorasi garovga o‘zgartirilgan.

Bundan tashqari, Muzaffar Aliyevning lavozimidan chetlashtirish to‘g‘risida Jinoyat ishlari bo‘yicha sudning ajrimi mavjud. Tergovga aralashish va to‘sqinlik qilish holatlarining oldini olish maqsadida boshqa tafsilotlar oshkor qilinmaydi.

Prezident administratsiyasi rahbari Sardor Umurzoqov rahbarligida 11-dekabr kuni o‘tkazilgan yig‘ilishda energiya resurslari bilan ta’minlash sohasida aniqlangan qonun buzilish holatlari yuzasidan bosh prokuror Nig‘matilla Yo‘ldoshev ayrim ma’lumotlarni ochiqlagandi.