Toshkent, Samarqand va Farg‘onada Singapur tajribasi asosida ayollar reproduktiv salomatligi markazlari ochiladi. Bu haqda sog‘liqni saqlash vaziri Amrillo Inoyatov xabar berdi.
Qayd etilishicha, Virtus Health Singapore Pte., Ltd. kompaniyasi bilan “Ayollar reproduktiv salomatligi: bepushtlikning oldini olish, genetik laboratoriyani rivojlantirish, sun’iy homiladorlik” markazlarini ochish bo‘yicha istiqbolli loyiha amalga oshiriladi.
Mazkur kompaniya 2002-yili Avstraliyada tashkil etilgan bo‘lib, reproduktiv salomatlik xizmatlari ko‘rsatish ko‘lami bo‘yicha dunyoda 4-o‘rinda turadi. Buyuk Britaniya, Irlandiya, Daniya va Singapurda 7 ta shifoxonasi, 44 ta reproduktiv salomatlik klinikasi va 54 ta laboratoriya markazi mavjud.
Qo‘shma loyiha doirasida kelgusida Toshkent shahar ko‘p tarmoqli tibbiyot markazi, Samarqand va Farg‘ona viloyatlari Perinatal muassasalari qoshida xorijiy kompaniya tajribasi asosida ayollar reproduktiv salomatligi bo‘yicha markazlar faoliyati yo‘lga qo‘yiladi. Ularda bepushtlikning oldini olish, genetik laboratoriyani rivojlantirish, sun’iy homiladorlik yo‘nalishlari bo‘yicha xotin-qizlarga yuqori sifatli tibbiy xizmat ko‘rsatilishi rejalashtirilgan.
Izoh (0)