“Biz shartnomada urg‘u berayotgan masala — O‘zbekistondagi Singapur ta’lim maskanlari bilan ko‘lamni kengaytirishga qaratilgan” — Oliy ta’lim, fan va innovatsiyalar vaziri o‘rinbosari

O‘zbekiston prezidentining Singapurga rasmiy tashrifi arafasida bo‘lib o‘tgan ikki davlat tadbirkorlari o‘rtasidagi ishbilarmonlik aloqalarini har tomonlama mustahkamlashga qaratilgan O‘zbekiston-Singapur biznes-forumida Oliy ta’lim, fan va innovatsiyalar vaziri o‘rinbosari Komiljon Karimov intervyu berdi.

Uning aytishicha, Singapur – hech qanday tabiiy resurslarga ega bo‘lmagan davlat.

“Lekin bugungi kunda jon boshiga qaraydigan bo‘lsak, dunyodagi eng yuqori yalpi ichki mahsulot aynan Singapurda. Buning siri inson kapitaliga investitsiyada. Singapur birinchi navbatda inson kapitaliga e’tibor qaratib, ta’limga investitsiya kiritgan. Bu yerda o‘qituvchilar maqomi juda yuqori, butun dunyo tan oladi”, — deydi u.

Ta’kidlanishicha, mamlakat intergratsiyaga e’tibor bergan.

“Ta’lim, fan va ishlab chiqarish integratsiyasi. Singapur aynan shunga katta urg‘u qaratgan. Ko‘plab loyiha va startaplar universitetlarda paydo bo‘lib, iqtisodga katta foyda keltirgan.

Bizda oxirgi yillarda oliy ta’lim qamrovini kengaytirishga e’tibor berilyapti – yangi universitetlar qurilib, mavjudlarini ko‘lami kengaytirilyapti. Biz shartnomada urg‘u berayotgan masala yurtimizdagi Singapur ta’lim maskanlari bilan ko‘lamni kengaytirishga qaratilgan”, — deydi Komiljon Karimov.